魚缸Blogger：中軟國際醞釀突破

尋日的黑雨半日市，唔少股份跌幅唔細，畀聯想控股揸住19.52%嘅中國軟件國際（00354），收報1.97元，跌幅1%，但留意到10日及20日線匯集在1.89元，再度醞釀黃金交叉，可博升穿五十二周高位2.08元見2.2元。

中軟從事提供綜合性軟件與信息服務，共有200個軟件著作權同多項專利，去年收入增長23.4%至27.68億元人仔，純利增長20.4%至1.33億元人仔，反映期內全球經濟不振對產品需求影響唔大，皆因主要客戶都係大型企業。

今年係佢上市十周年，由○三年一家創業板公司，發展至依家市值34億元的主板公司，規模明顯愈做愈大，去年除咗同阿里巴巴集團旗下子公司阿里雲合作雲端外，亦中標中國移動（00941）無線城市一級平台服務子系統等重要標段，月初更同雲博產業（08050）一齊投標中移無線城市項目其他部分，今年業績值得憧憬。