SUN勢力：創科追入唔算遲

港股半日市跌105點，唔少股份高台跳水，是否要做好走鬼準備？不妨睇埋伯南克聽證會後才決定，始終環球放水，資金要搵出路。

全球最大家用品零售商Home Depot前晚公布首季成績，盈利增長18%，優於預期，市場估計佳績持續至第二季，加埋昨晚美國會公布四月份成屋銷售數據，由三月份的492萬增至497萬，房產市道正朝復甦之路邁進。本欄二月時曾推介創科（00669），話此股是炒美國復甦的首選，結果股價由推介時的16元升到接近20元。

要衝破20元阻力兼企得穩唔係咁易，只不過Home Depot是創科的一大銷售渠道，佔去年銷售38%。銷售平台生意理想，創科首季業務應有一定得益。券商花旗對創科未來的盈利預測幾樂觀，指原料價格年來持續下跌約5至15%，有利毛利率表現，仲話盈利提升之路才剛開始，依家追都唔遲。