Fundman睇市：券商股 隨時追落後

尋日，日本央行開會，投票九比零通過維持寬鬆政策，央行仲對經濟展望睇法樂觀，事實日本首季經濟增長達3.5%，勁過晒G7任何一個成員，日股創五年半新高，日經指數收市升246點，報15,627點。

黑雨警告下港股得半日市，恒指跌105點，報23,162點，成交526億，雖然尾數26億來自新掛牌嘅銀河證券（06881），但三小時成交額，都已經算相當唔錯。走勢上，港股在一○年底至一一年初在22,123至24,988點形成密集蟹貨區，今年二月嘗試突破無功而還，不過隨住內地經濟及股市可能在上半年見底逐漸回升下，港股後市應該可以睇高一線。

講番銀證，首日走勢唔錯，一句到尾，係定價定得夠低，造就皆大歡喜的結局，保薦人最後以每股5.3元定價，介乎最先招股價範圍4.99至6.77元的下限，約1.28倍市帳率，比已上市的中信証券（06030）及海通證券（06837）的1.69倍及1.41倍平，總算留咗水位畀基金及散戶炒落後。

值得留意，五月初至今陸續見大行調低中國經濟增長預測，集中在7.5至7.7%，但見對A股及中資股負面影響似有還無，若非二月至今的跌浪已充分反映第一、二季復甦比預期疲弱的因素，就係股市投票機器已預視第三、四季會有穩定的復甦出現，加上憧憬唔會進一步推樓市調控措施，及刺激經濟方案會陸續在未來一季登場，相信A股已找到中短期一個重要支持。查實畀溢價買幾隻A股ETF之外，券商股是相當緊貼A股氣氛的曲線選擇，加上一二年業績基數奇低，未來兩季如無意外都會見到盈喜，筆者向來貪平，較傾向海通，唔知啱唔啱看官心水。

潤電等待終極一跌

近期資金由領先板塊轉到炒落後，家電股及電力股慘遭開刀，發改委話要進一步降低農產品生產流通環節電價，紓解相關行業成本壓力，另一根稻草係有大行分析員估計，因煤價回落，內地第三季可能減電價0.8仙人民幣，相當於2%減幅，結果短短三日，華能（00902）高低位差19.3%，大唐（00991）17.4%，連早前因為合併消息已隊咗一浸的潤電（00836），都隊多13.7%，戰況異常慘烈。

先唔提仲有唔少未上市的火電電廠，盤數先啱啱唔使見紅，全國減電費機會唔大，以每減1%電價，約等於減少5至10%盈利計，係搵藉口隊抑或真係淡成咁，大家可以自行判斷，筆者都係等緊潤電六月股東大會前終極一跌，博佢合併不成報復式反彈。