內地擬擴大新能源車試點範圍，並延長補貼，對相關車股有支持作用。（資料圖片）

黑雨下港股得半日市，恒指跌百多點，差些少回補晒周一嘅上升裂口，成交有526億元，正好用來說明延長交易時間，同成交增加並沒有直接同必然關係。唔少中資板塊亦如遇「黑雨」，電力、風電、手機、頁岩氣及油田設備股有如被洗倉，沽得咁狠，但又冇咩特別利淡消息，唔排除係班一路坐貨上嚟嘅基金喺半年結前沽貨套利。

內地擬擴大新能源車試點範圍，並延長補貼，對相關車股有支持作用。（資料圖片）

針對電力股沽壓沉重，有指中央出手救煤企，政策轉變導致基金力沽電力股，但阿莊唔覺得煤炭業供大於求嘅問題可以喺短期內獲徹底解決，故純以基金沽貨鎖定利潤看待近日電力股跌勢似較合適。另外，早前阿莊講過，要提防風電股炒到咁上下會有配盪活動，惟至今未見大規模集資，即使京能（00579）近日股價抽高後有股東減持，但折讓唔算太大，承接力比想像中強。總而言之，大震倉後有反彈行情絕不出奇，往後係再創新高抑或一浪低於一浪，就要睇貨源落在強者定係散戶手。

個別汽車股逆市走強，廣汽（02238）一度急升至8.6元，收報8.31元，升7.3%；長汽（02333）微升0.68%，收報36.8元；比亞迪（01211）喺高位整固，收報33.15元，跌0.9%，相對於四月以來股價累升達68%，調整壓力尚算溫和。尋日圍繞汽車行業有多個消息，內地方面，有指財政部、科技部、工信部及發改委四部委已達成共識，新能源汽車補貼政策計劃會再延長三年，且擬擴大試點城市範圍。另外，五月份汽車銷售保持強勢，預計車企銷量將達128萬台，同比升14%。海外方面，歐洲汽車業組織統計數字顯示，四月份歐洲汽車市場已結束連續十八個月嘅跌勢，乘用車註冊量同比增1.8%，消息均屬正面。

比亞迪續為首選

雖則話有國策因素繼續眷顧，但阿莊相信嚟緊汽車股會繼續個別發展，主要係大眾化及節能環保汽車嘅銷售前景能見度較高，反而豪華轎車銷售則會持續受「打貪」活動影響。喺節能汽車股中，比亞迪仍為首選，今年盈利復甦將成為推動股價上升嘅動力來源，唔信佢再升都唔好輕率做淡；長汽基本因素佳，股價強勢有因，只會強者愈強；吉汽（00175）及東風（00489）表現相對落後，但落後總有其原因，技術走勢暫未見突出；至於華晨（01114），仍須觀察受豪華轎車市場增長放緩嘅影響有多大，暫宜觀望。