樓市出更：樓上舖唔敢狂加租
近排零售消費氣氛麻麻，一線街地舖租金升幅「謝晒」，同街嘅樓上舖租金亦無運行，聽代理講，依家旺角、尖沙咀及銅鑼灣核心街樓上舖租金升幅無以前咁勁，由一、兩年前約三成至四成，跌到現時新租個案租金增幅只有約5至15%，有啲業主更罕有咁唔加租續租，挽留舊租客。舖壇老手黎永滔（滔哥）估計，樓上舖今年租金難有起色，睇怕最快出年年初至有轉機。
旺角西洋菜南街有樓上舖業主突圍，維持租金不變留客。
黎永滔認為，旺區樓上舖租金今年仍有壓力。（資料圖片）
核心購物區樓上舖最新租賃個案
劉Sir收到風，近幾個月一線街樓上舖業主叫租都「順攤」咗，唔少新租同續租租金加幅，都只係象徵式咁加一至兩成。
黎永滔：搶租成往事
滔哥話，內地豪客嚟香港狂掃高價鐘錶珠寶日子已過，商戶搶租銅鑼灣同埋尖沙咀一線街地舖嘅情況都會少番啲，唇齒相依下，呢啲旺街嘅樓上舖租金都受拖累，料由近一、兩年前升約三成至四成，去到今年只升約一成嘅局面。
旺角西洋菜南街其中部分時間劃作行人專用區嗰一段，一向都係內地同本地人消費集中地，竟然有個樓上舖續租都唔加租。個單位係西洋菜南街雙號1樓，面積約900方呎，餐飲店已經租咗約六年，租約就滿，業主決定唔加租續租，月租維持2.5萬元。
尖沙咀新租唔使7萬
尖沙咀嘅漢口道雙號1樓單位樓上舖業主為咗爭客，同個新租客傾掂數，每月租唔使7萬元，租金加幅只係有15%。
港島銅鑼灣駱克道近景隆街嗰段，樓上舖租盤多，競爭大，聽講嗰條街有個雙號1樓單位，原本係髮型屋租用，啱啱由另一個商戶以每月約3.8萬元租咗，租金加幅只約8.6%。
另外，劉Sir聽到一間喺香港狂開分店嘅美國智能電話品牌，聽講佢哋喺中環國際金融中心商場旗艦店諗住擴充，計劃增租樓面，「食」埋鄰近一個大舖，個商戶都打定輸數，已經喺區內搵緊新舖位。
