雖然發電設備板塊無特別消息，但東氣股價近日走勢明顯偏強。(資料圖片)

港股尋日回吐，恒指落番百幾點。見到炒風開始去到弱勢嘅航運股同煤炭股，心水清者知道呢個係升市末段嘅現象，要進一步得到確認，就可以留意吓啲細價股會唔會接力炒起，若然嚟緊細價股交投真係轉趨活躍，咁呢個升浪就叫做「圓滿」。本月底開始，新任國家主席將展開外訪行程，預計下月七至八日與美國總統會面，照計此前魚缸氣氛唔會差。綜合各項因素，炒埋六月底半年結就差唔多了﹗

雖然發電設備板塊無特別消息，但東氣股價近日走勢明顯偏強。(資料圖片)

前日買入短炒嘅騰訊（00700）有回吐，晨早見佢上唔到310元樓上，遂以308元沽出，落番300元樓下又會再留意翻兜機會。除咗弱勢股發力呢個見頂現象之外，企業抽水潮亦令人擔憂，尋日恒安國際（01044）就公布，發行一八年到期的53.34億元零息可換股債券。

企業掀起抽水潮

以恒安現價將近90蚊一股，呢批可換股債券持有人到期日贖回價相等於本金額的110.46%，即每年總回報率僅2厘，換股價又高達每股120.0825元，站喺公司角度，條款都幾吸引。但記憶中呢家公司好幾年都冇抽過水，雖然今次唔係配股，但係咪反映公司現價估值偏高倒值得深思。

另外，財險（02328）突然宣布H股及內資股供股計劃，集資總額57.96億元人仔，股價應聲跌2.5%，收報9.94元。翻看資料，財險喺去年八月才派發中期息合共25.74億元人仔，截至去年底嘅償付能力充足率仍高於監管要求，咁快又突然供股，確實令投資界感錯愕﹗係咪預示業務表現遜預期，不得而知，小股東宜認真審視公司業務發展策略，再決定是否參與供股。

尋日雖然係跌市，但唔少大價股逆市做好，如中國海外（00688）、兗煤（01171）、南車時代（03898）、濰柴（02338）及北控（00392）等均高收。論圖表走勢，呢兩日東方電氣（01072）都幾靚仔，10日線已確認升穿50日線，見黃金交叉利好訊號，尋日股價更一度略為升穿250日線13.87元，高見13.9元，收報13.8元，升5.1%，股價似乎已消化將被剔除於MSCI中國指數成分股嘅因素。論板塊冇咩特別消息，純睇走勢，且看是浪能否突破降軌阻力，成功企穩250日線樓上嘅話，下一個較大嘅阻力位喺15.8至16元，回吐初步支持喺13至13.2元水平。