吉祥大廈一○年獲批重建兩幢樓高28層商住物業，總樓面近35萬方呎。

近年市區舊樓吸引唔少發展商青睞，其中銳意响港島東區擴展版圖嘅新世界發展（00017）等，尋日就成功統一咗英皇道吉祥大廈其中一幢舊樓，係呢個重建項目首宗強拍，並以底價1.56億元投得，因為呢宗公開強拍個案，令佢嘅買家身份首次正式曝光。

吉祥大廈一○年獲批重建兩幢樓高28層商住物業，總樓面近35萬方呎。

新世界發展及周大福等代表昨以底價1.56億元，統一吉祥大廈一幢舊樓業權。

新世界發展等東區住宅發展項目

樓齡達五十三年嘅英皇道吉祥大廈，由於地盤面積超過三萬呎，可以話係港島區罕有私人重建地盤，所以當年併購有好多家發展商都曾經參與過。

市場就盛傳由新世界發展同周大福等擊敗其他財團攞到個項目大部分業權，而呢兩間公司一向口密，從來無出嚟表態或承認過，而項目其中一幢位於英皇道同禮信街嘅舊樓，尋日進行強制拍賣，兩間公司派出代表鄭先生出嚟舉手競投，身份先至得以確認。

十宗申強拍 半數待批

負責項目拍賣嘅第一太平戴維斯估價及專業服務董事總經理陳超國話，吉祥大廈分咗10宗個案申請強拍，估計仍然有約莫5至6宗個案有待批准強拍。

劉Sir知道，新世界發展响東區都有唔少具規模嘅重建項目，除咗吉祥大廈，佢哋之前併購番嚟嘅北角上下繼園里同繼園街5號，估計落成後提供約611伙。另佢哋响區內仲有天后新東方臺嘅重建項目。

紅磡舊樓底價6070萬

至於土地審裁處尋日亦都批咗九龍建業（00034）旗下公司提出申請嘅紅磡環景街19及21號同埋環順街20及22號拍賣底價，講緊拍賣價6,070萬元。另外，恒地（00012）旗下公司星期一向土地審裁處申請強拍深水埗南昌街9至19號，並分拆成3宗個案入稟，佢哋揸住上址業權份數由83.34至91.67%不等，每宗個案嘅估值由4,300幾萬去到5,000多萬。

終審法院就九龍城南角道嘅判決，第一太平陳超國話，相信最影響深水埗、大角咀、九龍城同跑馬地區裏面建於五、六十年代嘅舊樓，希望政府能夠再次透過作業備考酌情處理，否則影響市區重建步伐。