恒指期貨走勢

昨日港股裂口高開幅度唔算大，多得好友審慎的叫價，五月期指居然以23,169點開出，剛好在筆者定的入市位23,176點樓下，限制好倉盤順利成交。

恒指期貨走勢

昨日期指早市升穿23,350點之後，波幅唔大，兩次即市回吐，在23,359及23,356點行人止步，半杯水故事，可視為好友未夠決心在現貨剛破頂之下，立即再下一城，又或者淡友的冚倉盤仲未湧現，進一步推高好淡雙方交易區。姑勿論如何，裂口破位後即市調整壓力唔大，多少可見市底之強。

即月期指昨日最高見過23,436點，日間時段報收23,371點，成交6.41萬張，比現貨低水122點，撇開除息因素，實際只低水8點。恒指升410點，收報23,493點，主板成交創一個半月新高，去到690億元，至於留低的23,163至23,348點裂口，以昨日強勢看，未必短期可以回補，反而二月的23,406至23,637點裂口未有完全回補，應該係短期升浪較實在的阻力位。