Fundman睇市：內銀股 叻唔到去邊

大市由四月低位21,423點起步，至今累積升幅9.66%，對比美股、日股近期屢創新高，港股連年初高位23,944點邊皮都未掂到，難免教人想到，近期升浪似基金追落後多於一切，尤其港匯近日並無轉強迹象，尋日在7.762附近，同舊年年底長期企穩強方兌換保證7.75相比差一截，樂觀嘅或者認為熱錢未全面湧入，港股相對有水位，但觀乎藍籌權重股，今年中移（00941）就4G固定投資唔明朗，落後於人。中石油（00857）及中海油（00883）在國際油價被商品市場大插拖住後腿，升幅也少於大市。

三隻佔指數比重一成七的內銀股，經過尋日抽升，本來勉強升勢拍得住恒指，點知收市後，工行（01398）的策略股東高盛，以2.5至3%折讓，介乎5.47至5.5元減持手上最後一批市值11億美金的工行股份，話就話今次清倉以後唔使再怕高盛大手減持，不過這間坐盤坐到出神入化，年年賺大錢的美資投行，揀呢個時候沽貨，實在令人有小小擔心，至少中短期內，佢地睇內銀股叻唔到去邊。唔信睇番上一次，即係一月份高盛以5.77元減持的一批工行，接貨者一接就坐艇坐到今日，死未！

不過，在全球資金氾濫下，美日股市愈升愈有，港股遲早會升穿年初高位23,944點，好似季績好的騰訊（00700）可以連抽兩日，累積升35元，挾起淡倉上嚟，真係乜都有可能。尋日所見，資金對風險資產嘅興趣的確有改善趨勢，跌市中一直領先大市的電力、家電、燃氣股，在高位有回落迹象，反之大落後嘅航運、煤炭及內需股都見資金回流。可以預期，當恒指短期內突破年初高位，刺激最後一批猶豫的騎牆派都入市，更多落後甚至蚊型股，都有炒起的可能。

揀中型內房博一鋪

尋日提到，愈來愈多基金經理及分析師估計，中央在「國五條」之後，今年餘下時間再推調控樓市辣招的可能性唔大，唔單止內房股，就連內地樓市準買家，也有相似睇法，三月推「國五條」後，四月份全國70大城市樓價，同去年同期或者三月份比較，仲分別有68及67個城市錄得升幅，「國五條」可能減慢樓價上升的速度，但並無改變樓價上升的方向。

尋日話要睇嘅內房股「Big 5」，埋單升幅介乎1.3至7.6%，諗深一層，既然相信後市有機會呈雞犬皆升格局，一於博大啲，搵「晒士」高於大部分基金10億美元（78億港元）市值入貨門檻、但又無「big 5」咁難推得郁、上落更快的中型內房。而首四個月銷售進度唔錯、目前市帳率低於1倍、市值有110億至220億港元的幾隻中型內房中，個人較睇好越秀地產（00123）、保利置業（00119）、合景泰富（01813）、深圳控股（00604）以及佳兆業（01638），唔知看官有冇啱心水？