雖被禁止未來三年參與政府資訊科技產品採購活動，但相關銷售其實只佔神數整體業務極小部分。(資料圖片)

救市憧憬帶起A股，加埋傳出七一阿爺或送大禮，刺激恒指尋日急升410點，收報23,493點，成交增至694億元。今年投資者若然迷信「Sell in May」，呢一刻相信會相當閉翳！所以話，投資呢家嘢冇一本通書可以睇到老。按照目前嘅市況，阿莊維持早前嘅講法，即係等埋一批新股同做基金半年結就開始抖暑，想搵定度假本錢，呢排要勤力啲炒出炒入，密食當三番！

雖被禁止未來三年參與政府資訊科技產品採購活動，但相關銷售其實只佔神數整體業務極小部分。(資料圖片)

阿莊100萬元投資組合

尋日提及嘅騰訊（00700）除淨，難得開市價僅293元，有心唔怕遲，拿拿臨追入2,000股，結果高位見310元，收報309.4元，升6.2%，成交37.9億元，買嚟短炒今日會睇位食胡。此外，蒙牛（02319）宣布引入達能成股東及組合營，股價單日升10%，收報27.05元。從騰訊及蒙牛嘅例子可見，啲實力股一係唔行，一行就唔得了。奈何阿莊揸住嘅中燃（00384）好似恒指PUT輪，大市升幾百點，佢就跌半成，睇吓幾時輪到佢發圍！

今年二月，神州數碼（00861）因旗下神州數碼（中國）被行政處罰，禁止三年內參加政府資訊科技產品採購活動，消息引發神數股價大跌，上月低位見9.27元。不過，當時公司已澄清，正就事件提出覆議，並指去年四月初至十二月底止期間，神數（中國）對政府機關嘅銷售額僅佔神數同期銷售不足0.4%，可見股價跌勢係心理大於一切。再睇番神數截至去年底止首三季度業績，營業額同比增6.8%，至566.7億元，純利增11%，至11.7億元；單係第三季度毛利率達到8.01%，扭轉上半年跌勢，相信年度業績將可為經營情況提供一幅更清晰嘅圖畫！

購太光增融資平台

今年三月，神數就與深圳市政府就未來於深圳建立電子信息產業基地嘅合作訂立意向書。至近日，神數宣布擬收購深圳上市公司太光電信股份嘅若干股權，可能涉及向其注入資產。換言之，有可能係借殼分拆業務上市。若然成事，料有助釋放公司嘅資產價值，且喺內地多一個融資平台，方便日後同深圳市政府嘅合作。

呢家太光電信係ST股，已預告今年上半年蝕約400至450萬元人仔，主要業務為銷售通信設備、銷售電子產品及進出口業務等。太光嘅停牌通告，承諾爭取喺六月五日前按例披露重大資產重組訊息，以此推斷神數呢單嘢傾唔傾得成六月五日前會有進展，此前可考慮小注投機性跟進。

尋日神數以全日高位11.28元收市，升5.4%，下兩個阻力位分別喺250日線12.3元及年初高位14.32元，止蝕位可定喺10元。