推出拍賣的元朗農地近大樹下西路一帶。（資料圖片）

近年新界農地愈來愈受注目，成為唔少投資者涉獵嘅新目標。本月底就有拍賣行一口氣推拍8幅農地，相信有機會係歷來單一私人拍賣推出最多農地嘅一次，開拍價由35萬至600萬元。其中，元朗一幅佔地逾萬方呎農地，喺今年二月份以190萬元成交，三個月間，即叫高一倍以380萬元開拍，升值潛力驚人。

推出拍賣的元朗農地近大樹下西路一帶。（資料圖片）

今年拍賣沽出的部分農地

住宅工商舖等樓價節節上升，搞到物業投資嘅誘因大大減少，所以一向被認為流通量唔高嘅農地，成功吸引唔少投資者嘅捧場。

劉Sir粗略估計，今年到依家為止，已經有約8幅農地透過私人拍賣行賣出；而本月底環亞拍賣行一場拍賣會，更一口氣拍賣8幅農地，分布响大埔同元朗區，部分地段面積超過1.7萬方呎。

而其中元朗一幅農地，地段面積約13,068方呎，拍賣開價380萬元，平均每方呎地價約291元，根據規劃署網站資料，該農地鄰近大樹下西路。據土地註冊處資料，今年二月底由兩名個人名義買家聯手購入，當時登記成交價190萬元，現開拍價足足高出一倍。

買入博發展商收購

另一方面，拍賣行老友曾傑俊同劉Sir講，話近年農地買賣市場的確活躍咗好多，唔少人除咗買嚟作為農莊耕種，部分投資者購入等發展商收購，甚至透過「套丁」等形式發展申請建屋，所以具有一定嘅投資發展潛力。

大埔農地僅35萬起

至於位於大埔大美督，就有達6幅農地，據拍賣行資料，開拍價由35萬元起，按部分有提供地段面積嘅農地計算，每方呎地價400餘元；另外，同區一幅面積最大嘅農地，佔地達17,385方呎，餘段部分只出售七分之五業權，拍賣開價為600萬元。

過去不少農地透過私人拍賣行易手，都可錄到理想成交價；早前東涌有部分屬建屋地嘅農地，獲搶高以240萬元賣出。