Fundman睇市：內房股 屆上升周期

早輪七國財長會議無將日本的2%通脹目標及無上限量寬計劃放入議程，市場解讀係七國財長變相默許甚至認同日本瘋狂放水的舉動，日圓愈跌愈急，上周五見103.21，創○八年二月以來收市最低，全世界都睇住破「百算」之後，YEN要跌到落110水平。

中國在今浪全球放水潮中，真正人做我唔做，相當有個性，人民銀行透過正回購抽走市場流動性，為寬鬆貨幣政策打修正球，結果匯價屢創新高，股市卻不振，年初至今A股升得0.6%，是韓股以外表現最差的亞洲股市。從三、四月經濟數據顯示，內地要保住7.5%經濟增長目標，下半年放水的機會應該高過進一步收緊銀根，事實由去年的情況可見，要支持經濟增長又同時嚴控樓價，是相當困難。

近日，國務院宣布取消及下放117項行政審批項目，完成領導人換班後，中央開始釋出政府願意改革的姿態。特別留意樓市，《國五條》地方細則三月公布，「政策末班車」效應使三月樓價及成交急升，但到四月，房價未有因此放慢腳步，首四個月，內地商品房銷售按年大升六成，滬穗再現新地王，而內房股股價亦靜靜起革命，紛紛從三月份反彈，在在反映股市的投票機器，已預估在經濟及樓價調控之間，中央可能要作出取捨。

世房去貨進度良好

史提芬估計，內房股第一季可能已見了今年低位，進入新一輪上升周期，目前內房市盈率平均6倍左右，即使係「Big 5」嘅中國海外（00688）、華潤置地（01109）、碧桂園（02007）、龍湖地產（00960）及世茂房地產（00813），講緊亦不過係7至11倍。這些內房企業於一三、一四年的銷售目標，大都保持增長，計落比起等政府打救的基建、資源及內需股吸引，至少我們看到「磚頭市場」嘅需求，在政府措施阻攔下依然不缺。

講開「Big 5」，史提芬個人認為世房最啱心水，截至四月底完成183億元（人民幣﹒下同）銷售，已經達到全年550億目標的三分之一，係同業中完成度比較高的一間。展望五、六月，氣氛好加上推盤數目較多，市場估計可以錄得單月60至70億、及70至80億元單月銷售數字，現價市盈率唔夠8倍仲有近三成折讓，「Big 5」中最抵買，不妨留意。