騰訊首季業績理想，展望未來盈利仍有進一步增長空間，難怪成為基金愛股。（資料圖片）

港股上周企穩喺23,000點水平，多得大笨象（00005）及騰訊（00700）發力，而板塊炒風則以風電股稱冠，金風科技（02208）話咁快升穿目標價，上周四曾高見5.86元。魚缸游資繼續玩對對碰，下一轉唔排除又翻炒頁岩氣股，其中宏華（00196）近期表現明顯跑輸同類股，但相信喺4元樓下消化沽壓已八八九九，有條件玩轉追落後。

騰訊首季業績理想，展望未來盈利仍有進一步增長空間，難怪成為基金愛股。（資料圖片）

因憂慮聯儲局退市，早前有報道指，美國多家大學基金如耶魯、普林斯頓、康奈爾等都大幅減持美債，就連日本都在減持，偏偏中國依舊係美債大買家，究竟最終邊個係傻仔？睇見上周四金價再度跌穿心理關口，一眾「中國大媽」慘被套牢，難道民眾如是，國家眼光亦不外如是？

分散投資降低風險

還記得早幾年中國一直強調要建立戰略石油儲備，但近年才驚覺美國已成功開發更廉價嘅頁岩氣，油價當堂升唔起，中國亦唔再睇甚麼戰略石油儲備，轉而跟風發展頁岩氣。阿莊有感，全球經濟發展依然係由美國操控，嚟緊幾年美國會唔會咁順攤讓人仔順利成為全球流通貨幣、會唔會藉債券價格同息口變化來一次東西方身家大轉移？中國經濟又會唔會硬着陸？阿莊都冇水晶球，反正投資總有風險，任外資如何吹捧又或者唱淡，都係平常心，因應本身可承受嘅風險分散投資，唔好將所有雞蛋放喺同一個籃。

騰訊（00700）上周公布首季度盈利按年增37%，至40億人仔，即係話平均每日賺4,000幾萬人仔，真正係豬籠入水！睇番份季績，季內微信及WeChat嘅合併月活躍帳戶較去年底增長23%至1.94億名，經營活動所得現金流入淨額同比增長43%至69.78億元人仔，截至三月底止手持現金及等值增至150億人仔，無論增值服務、網絡廣告同電子商務交易業務嘅表現都錄得增長。隨着公司將更多新服務整合至微信，增長前景能見度將更高。

上周四，騰訊股價一舉突破282元阻力位，創歷史新高295.4元，收報292.2元，升6.49%，成交達到36.8億元，而當日其沽空比率僅10%，按日下跌5.8個百分點，反映大戶亦唔敢輕言做淡。睇嚟本周其股價可順利試叩300元大關，嚟緊一段時間反映傳統經濟嘅內房及內銀股仍會受調控措施掣肘，反觀代表新經濟嘅騰訊取而代之成為基金愛股！