近年金魚街大型快餐店及連鎖食店數目明顯增加，個別更是區內新店。

近四十年前，旺角通菜街一段售賣金魚嘅舖頭過百間，因而得名「金魚街」，依家條街賣金魚嘅舖頭剩番60間都冇，唔少早喺三、四年前由寵物店承租外，內地人鍾意嘅連鎖食店及餐飲集團等，呢幾年都密密手「蠶食」該街道，商舖數目超過20間，進身為該街第3大類別商戶。業主都唔執輸狂加租。有啲新月租嗌差唔多16萬元，比之前租金有約1倍升幅。

近年金魚街大型快餐店及連鎖食店數目明顯增加，個別更是區內新店。

市民憂小店
經常到旺角「掃」街邊小食的軒仔表示，希望金魚街地舖業主加租溫和，讓港式小生意可以繼續生存。

商戶驚租貴
於金魚街賣金魚約十年的負責人認為，金魚街食肆搶租，是刺激該街租金大升的主因。

金魚街（通菜街）地舖租賃個案

五十年代起，油麻地火車站（即係近今日嘅旺角東站）附近，係金魚商販集中地，七十年代起，就搬到旺角道至水渠道嗰段通菜街，高峰期嗰陣，條街幾乎全部都賣金魚，所以叫「金魚街」。有代理同劉Sir講，依家「金魚街」商舖約百幾間，賣觀賞魚、海龜同水族用品嘅舖頭少於60間，其中近始創中心嗰段，人流較少，食肆暫時搶租意欲唔大，舖位租金加幅相對冇咁癲，如該街道一個賣金魚單號舖，早前以每月約10幾萬續租，較之前租金升約50%。

水族店：加租勁寧結業

不過，都有業主「獅子開大口」，有個原本由水族店租用嘅雙號地舖同低層部分，前租金每月約8萬元，業主現時意向月租加1倍至約16萬元，呎租約80元。喺金魚街賣金魚約十年嘅商戶負責人話，「近年內地人去金魚街幫襯食店多，仲搞到租金貴晒，若果上址加租厲害，不如退休唔做。」

有金魚商販敵不過貴租，唔少已轉租太子大南街，部分則選擇結業，甚至早在三、四年前起由寵物店取代，數目亦開始多，現時有約15間，其中一個單號逾1,600方呎的地舖，獲寵物店以每月逾12萬元承租，料較前租金升近1倍。

餅店廿幾萬搶租貴60%

內地旅客多從旺角東站到區內「血拼」，間接帶旺金魚街，連鎖快餐店及本地餐廳等積極進駐外，有日式豬扒食店都選址該街開新分店，聽講有餅店早排以每月約21萬元，租用該段街一雙號地舖，月租20幾萬，較前租升60%。另鍾意到旺角「掃」街邊小食嘅軒仔話，「如果金魚街愈來愈少金魚舖，點算係金魚街。」