Fundman睇市：吉汽 現價買得過
在美國聯儲局中屬於鷹派立場的費城聯儲銀行行長普洛塞，前晚在一個演說中提到，美國就業數據及薪金都有穩定改善，如果聯儲局下個月唔立即開始提出削減買債規模（即係退市），最終將要賠上信譽。
太陽日誌2013/5/16
綜合大行預測吉汽業績（人民幣）
普洛塞唔係第一次出口術游說聯儲局其他鴿派成員考慮退市，意外係美股當佢無到，前晚道指再創歷史新高，升123點，報15,215點。美股新高，港股重上兩萬三點樓上，恒指升113點，報23,044點，始終唔係環球大孖沙熱炒的市場，成交奀到得554億。
比亞迪（01211）升4%，收報33.25元，中段並見過33.95元的兩年新高，一來係45部比亞迪E6電動的士正式「攻港」，另外股神巴菲特周一訪華期間接受央視訪問，話無意沽售比亞迪，也成為炒作原因。
來路貨撼贏比亞迪
講開電動車，唔能夠唔提電動車鼻祖，基地位於矽谷的Tesla（美股代碼：TSLA），佢電池管理技術，供應全球幾間主要有生產混燃及純電動車車廠，早輪自己生產的電動超跑房車Model S來港畀人試車兼預訂，筆者有幸試過立即痕起上嚟，無奈香港地搵叉電未係咁易，不過由外形與性能，同E6拍埋真係贏九條街（唔信不妨Google一下！）。
早幾日Tesla季績，史上第一次虧轉盈，股價一星期內由58美元挾到97美元，計落急升後，市值97億美元或者750億港元，居然仲細隻過987億的比亞迪，如果要鬥電動車應用技術及商業價值，一係兩隻都搞，即使Tesla有排都未全面賺錢，但背景故事一定較比亞迪動聽得多。
近排幾隻汽車股在四月銷售數字公布後，普遍都有唔錯升幅，長城汽車（02333）四個月累積完成全年銷售目標36%，吉利汽車（00175）33%，華晨（01114）34%、東風（00489）27%，除了東風受日系的東風日產及東風本田銷量較弱拖累外，大部分都超過全年銷售目標三分之一。吉汽因為兩款SUV（多用途車）GX7及SX7車款暫時僅達銷售目標兩成，抵銷了其他經濟型車款的強勁增幅，不過近兩日股價穿一穿4元後，好快搵到支持，尋日拗腰上翻4.07元，升3.3%。
睇番大行報告，對於吉汽SUV銷情未達預期，其實都有唔少正面嘅睇法，認為無減價促銷保住首季毛利率，尤其係上個月上海車展，大眾推新款桑塔納及捷進打低階市場，今年一心以SUV改善產品結構的吉汽，反而被睇好下半年會有表現，一三年10.7倍PE，以今年兩成三增長，睇嚟4元仲係買得過。
