新蒲崗振發工廠大廈中層戶，獲港島商廈收租客承接。

港島甲級商廈買賣風高浪急，有投資者選擇按兵不動，不過部分積極啲嘅就將資金轉投高回報嘅工廈連約單位，現時該類工廈單位租金回報率高近5厘，拍埋甲級寫字樓收租回報依家少於3厘計，聽落都知邊樣筍啲。

新蒲崗振發工廠大廈中層戶，獲港島商廈收租客承接。

近期商廈資金轉投高回報工廈個案

有投資者就做足功課先入市，知道新蒲崗依家工廈樓價相對觀塘低約四成，早前就購入五芳街嘅立安工業大廈低層單位，涉資約1,140萬元，收租回報近5厘。

雖然近排工商舖買賣慘淡，但有代理同劉Sir講，原來有啲寫字樓投資者擔心商廈收租中長線會跑輸通脹，近排已掃入工廈單位收租。

振發中層 兩客爭購

有投資者事前做足功課，知道觀塘同埋九龍灣工廈呎價差唔多要4,500至近6,000元，而租金回報率一般只有約3厘，而新蒲崗工廈呎價都係約莫2,200多至3,500元，而租金回報率去到約4厘或以上，早前就拍板買五芳街18號立安工業大廈低層單位，涉資約1,140萬元，呎價約2,280元，單位依家呎租近10元，租金回報約4.9厘。

另外，同區七寶街3號振發工廠大廈有個中層單位，原本畀同廈一個收租客傾緊，突然「殺出」港島商廈另一收租客以約750萬元快一步購入，呎價約2,780元，收租回報約4厘。

葵涌細戶 430萬照殺

有商廈投資者都好知行情，收到風長沙灣同葵涌工廈租金升緊，過去一年部分升幅更達約兩成，於是早前購入長沙灣道883號億利工業中心一個低層單位，涉資約750萬元，呎價約4,170元，租金回報率約4厘。

另外，對於資金唔係咁多嘅散戶，葵涌部分兩千方呎樓下工廈啱佢哋，其中，華星街8至10號華達工業中心中層一個單位，啱啱獲尖東商廈長線投資者以約430萬元購入，呎價約2,280元，但係租金回報都有4.2厘。