SUN勢力：精電仍具上升空間

日本央行實施大規模量寬，日股上周五飆高416點後，昨日再升174點，是表現最好的環球主要市場。日圓持續貶值，上周終失守100大關後，昨報101.76，續處逾四年低點。

有錢大戶今年以來買日股、沽日圓，贏到荷包脹，一般散戶礙於未必有咁多渠道進攻海外市場，但買日圓貶值受惠股，同樣可以執唔少。

精電（00710）近年業績相當反覆，○九年見紅，蝕2.68億元，一○年由虧轉盈，賺2.1億元，可惜動力不足，一一年盈利倒退，一二年微增1.6%。然而，股價如坐火箭，今年初還不過是3元左右水平，半年唔到已升穿6元，昨日回軟至6.27元，累升逾倍，是○五年以來新高。原因好簡單，因精電大部分的零件都來自日本，比例超過65%，受惠日圓貶值非常直接，加埋新生產線，新市場的開拓以及原來市場的復甦等多方面利好因素，對一隻往績市盈率只有11倍的股份而言，仲有唔少上升空間。