九龍建業持有大部分業權的紅磡「環字四街」地盤，重建後總樓面超過三十六萬方呎。(資料圖片)

自從政府推出買家印花稅後，舊樓收購活動可以話靜晒，而近排一、二手樓價齊冧，部分小業主見勢色唔對，都拿拿臨將單位賣畀收購緊嘅發展商，好似今日進行強拍的紅磡環順街及環福街項目，屬同一個重建範圍內的幾宗強拍申請，四月份夾夾埋埋就有10宗轉手個案，可以話係同類單一個月嚟最旺。

九龍建業持有大部分業權的紅磡「環字四街」地盤，重建後總樓面超過三十六萬方呎。(資料圖片)

「環字四街」上月部分成交個案

睇番土地註冊處上個月嘅登記，單係九龍建業（00034）收購緊嘅紅磡「環字四街」，包括環景街、環順街、環安街同環福街呢個地盤，單一個月就有約莫10個單位易手，涉及總值超過3,300萬，包括另類物業投資者陳應佳等揸住嘅環安街一個雙號數地舖，就以630萬賣咗，若果以間舖面積約逾360呎計，成交呎價大概萬七蚊。

陳應佳四年袋430萬

之前佳叔曾經講過，自己○九年用咗203萬買呢個舖返嚟，一一年田生集團（00183）曾經出過1,100萬想收個舖，不過，佳叔覺得附近嘅舖成交價都成千萬，出千一萬收佢個舖好似低咗，所以最終無賣到。

點知後尾九龍建業自己搞番呢個地盤，仲响舊年四月入稟申請強拍，雖然口價無之前咁理想，但佳叔唔夠四年帳面淨袋近430萬，升值咗兩倍幾，都咪話唔和味。

「環字四街」九建申強拍

資料顯示，上述「環字四街」地盤，九龍建業分成14宗個案申請強拍，地盤面積合共超過4.3萬方呎，重建後總樓面有近36.5萬方呎，可以話係市區大地盤之一。

除咗紅磡嘅地盤，恒地（00012）舊年八月申請強拍嘅尖沙咀山林大廈，同埋由財團收購的上環鴨巴甸街28至30號地盤，剩番嘅單位都响上個月易手，相信有關發展商或已經成功統一業權。