股海實戰：國美 趁勢炒一轉
滬綜指上周企穩喺2,200點樓上，周五收報2,246點，只係喺調整經濟結構嘅大前提之下，阿莊 認為不宜對A股短期表現抱太大期望。至於港股，上周五先低後高，恒指收報23,321點，一周升幅2.7%。相比之下，國指表現更省鏡，上周升幅4.6%，且剛現黃金交叉。花旗話嚟緊內地予個人投資者赴海外投資，利好港股，H股表現可跑贏A股，言則不妨從AH差價中發掘炒作對象。
國美發盈喜，預計首季收入及純利較去年同期有增長，顯示經營情況好轉。（資料圖片）
上周指數高企，明顯見到一批靜咗好耐嘅二、三線股開始接力，上周五魏橋紡織（02698）升近一成、擬出售虧損業務嘅中國鋁業（02600）升逾半成，其他熱炒嘅還有中航科工（02357）、廣藥（00874）、百麗（01880）以及銷售數據利好嘅廣汽（02238），升幅介乎4至7%。阿莊上周推介過嘅雨潤食品（01068）亦對辦，話咁快上咗5.9元，本周初若能企穩250日線5.85元樓上，升勢應可持續。
中芯只宜即日鮮
如今各國放水，指數暫未有大幅調整之虞，資金開始放膽跟進落後股，不論好醜。早前阿莊提及過嘅中芯國際（00981）走勢呈突破，高位見0.65元，收報0.64元，升6.67%，成交2.12億元。今年中芯可以炒作嘅故事不外乎係公司由虧轉盈，但呢個概念唔係第一次炒，相信唔少曾為之損手嘅股民仍有心理包袱。純睇技術走勢，目前中芯股價14日RSI經已升到上70，市帳率去番1.1倍，除非經營表現真係有好大突破，否則短炒要抱玩音樂椅遊戲嘅心態，最好盡量走即日鮮以控制風險。
同樣係毫子股，但股價仍斯人獨憔悴嘅有國美電器（00493）。上周見民企股中，中國綠色（00904）同雨潤都炒得起，照計國美亦唔難掹車邊炒一轉。上周國美發盈喜，預計首季收入及純利將較去年同期有所增長。阿莊亦相信，喺公司積極關閉低效率門店及電子商務業務虧損減少之下，今年嘅業績縱使仍在相對低嘅水平，但至少應該可以止跌。除咗業績因素之外，盛傳工信部將於年中前發出虛擬運營商牌照，工信部官員曾公開表示，國美具備發牌條件。短炒策略，上周股價營造出一支小旗形，上周五收市0.82元，若本周股價能突破旗形，10日線有勢升穿50日線，小注一試，首站睇250日線0.9元，止蝕可參考近月以來收市低位0.77元。
