太子區交通方便，有不少單幢樓的迷你單位可供選擇，因此淡市下仍然錄得成交。(資料圖片)

近期二手樓價狂升，好多人都以為要喺市區買到二、三百萬元嘅樓等於無可能，但市區仍然有部分迷你單位可供選擇。例如交通方便嘅太子區，依家二百零萬都仲有貨揀，好似喺大埔道嘅華都大廈，最近有一房一廳單位叫價210萬元，銀行有機會估足價，相信係八十後、九十後上車人士嘅綠洲。

太子區交通方便，有不少單幢樓的迷你單位可供選擇，因此淡市下仍然錄得成交。(資料圖片)

太子區近日單幢樓成交及放盤

富榮地產陳振文同劉Sir講，喺太子區雖然以單幢樓為主，但勝在交通方便，飲食、娛樂俱備，所以雖則近排樓市交投咁靜，但區內仍然錄到成交，而買家好多都係八、九十後年輕上車人士，約莫佔整體客源七至八成，主要係呢區單幢樓入場費唔高，有啲迷你單位涉額仲平過新界樓，吸引部分銀彈有限嘅用家買嚟住。

嘉怡兩房戶嗌290萬

其實太子區依家都有幾個約二百萬嘅放盤，銀行仲有機會估足價。陳氏話，好似一九七七年入伙嘅華都大廈，有個低層單位，實用面積191方呎，以一房一廳間隔，依家叫緊約210萬元放盤，有銀行對呢個單位有機會估足價，對班年輕客都算吸引！另外喺太子道西嘅嘉怡大廈中層B室，實用面積259方呎，有埋兩房間隔，叫價都係大約290萬元。

雖然大市近排都幾靜，不過太子區都有成交，有唔少成交更加係200萬元有找。

收租客追價買荔塘

好似塘尾道嘅荔塘大廈高層4室，實用面積約226方呎，本來叫價190萬元放盤，有收租客見200萬元樓下市區盤，即追價3萬元，用193萬元買個單位收租，實用呎價8,540元。

陳氏又講，之前有個客，一路睇開港島樓，但係業主成日話減價，但減咗之後都唔平，個客結果過太子區搵樓，睇中白楊街永華大廈一個中低層單位，實用面積約265方呎，見業主肯減26萬元，一睇即以約242萬元買咗個單位，實用呎價約9,132元。