魚缸Blogger：海隆成功突破阻力

要數呢期得寵板塊，相信非油田服務股莫屬，好似月內推介過嘅安東油服（03337）、百勤油服（02178）同華油能源（01251），尋日都再破頂，另一隻海隆控股（01623）亦成功突破3.47元阻力，即市創出3.57元的上市新高，收報3.51元，升幅6.6%，可以關注吓。

海隆業務包括鑽杆及相關產品、塗層塗料及服務，以及油田服務，去年收入增長23.5%至22.6億元（人民幣．下同），純利增長14.2%至3.45億元，其中以油田服務分部增長最多，收入同利潤分別上升45.6%及78.9%，可見市場需求有幾咁大。

公司係中石化（00386）唯一鑽杆產品戰略供應商，三月底公布旗下附屬斥3,520萬元，收購南通鋼管44%權益，完成後間接持股量增至85%，有利垂直整合製造鑽杆的原材料供應、控制成本同質量。另外，海隆喺天津同俄羅斯的OCTG（石油專用管材）塗層廠已於去年投產，有助紓緩塗層服務產能瓶頸問題。承接近日強勢，短炒目標睇4蚊。