太陽日誌

道指破萬五，標普穿千六，黑田put概念長炒長有，就連日經指數尋日復市，都要狂升3.5%，穿埋萬四點，創美國次按海嘯後新高，仲硬頸唔認港股轉勢，等同跟自己荷包作對。儘管無乜特別利好消息，但港股尋日自動波，恒指平開後拾級向上，埋單升132點，報23,047點，成交576億，沽空佔成交比例第二日企在雙位數，有10%，升跌股份比例61對39，稍稍比周一的69對31回落，二三線升多跌少情況明顯。因為澳洲意外減息，澳元隊穿1.02雙底，亦都令藍籌中澳洲投資比重最高的中信泰富（00267）升2.8%，名列藍籌榜首。

太陽日誌

大行預測東風及華晨一三年業績（人民幣）

貿易數據成關鍵

原諒筆者又再小人之心度滙控（00005）之腹，大笨象季績出乎預期咁好，稅前溢利幾近翻一番，由去年同期的43.2億美元躍升至84.3億美元，較平均預測的80.4億美元為高，股東權益回報率14.9%，貼近12至15%目標上限。儘管今次業績死貓彈，唔少成分來自減值從高峰回落、削減成本得宜、以及「炒房」的環球銀行及資本市場業務收益優於預期等等，不是太高質素及持久的收益來源，但大笨象捧場客也實在餓股太耐，業績一出，滙控在倫敦挾升2.8%，去到733.6便士，仲幫埋夜期抽上二萬三樓上。

今日內地公布四月貿易數據，A股可唔可以升穿2,250點阻力，扭轉一浪低於一浪，食粥食飯就睇今舖，尤其市場估得都幾悲吓，估計出口由三月的10%增幅收窄到四月的9.2%，進口則由14.1%跌到13%，另估由貿易逆差8.8億美元，番到去有161.5億美元順差。

繼續市場尋寶，睇番幾隻正路汽車股其實都幾落後，今年吉利汽車（00175）升11.4%算係比較標青之外，華晨（01114）及東風（00489）真係升得唔多，得2.3及2.5%進帳。吉汽比較強勢，除咗因為估值11倍唔到，比較平易近人之外，上半年因為產能樽頸，SUV銷量遜色的情況下半年可望解決，有故仔配合炒作。

至於華晨，賓架驚內地高消費放緩及中央反貪，不利寶馬銷情，不過管理層已表明唔會將價就市，唔割價促銷之餘，仲訂寶馬全年銷售目標22萬架，升三成。以13倍市盈率，今、明兩年20.5及28.5%的盈利增長預期，10元左右股價其實幾吸引，早前真係有沽過龍之嫌。

東風第一季業績的確令人失望，尤其日中爭議影響比預期長，第一季仲要繼續維持每架車補貼千元，銷售量仍要跌4%（日系跌幅更大），不過亦可視為基數低，未來改善空間大，尤其今年有暢銷新款「天籟」補上，跌到8.7倍的PE亦平霸同儕，觀感同華晨一樣，以三至六個月為限，贏面應該幾大。