股海實戰：馬鋼有條件追落後
正當大部分人都以為23,000點關不易攻破，現實卻破得輕而易舉。尋日恒指收報23,047點，升132點，成交增至567億元。收市後見大笨象（00005）份季績唔錯，加上剛現黃金交叉（10日線升穿50日線），是浪有機會上試五十二周高位88.45元。另一重磅金融股友邦（01299）尋日亦呈突破，創出五十二周高位35.45元。後市恒指能否更上一層樓，就要睇A股能否送上東風！
隨着保障房等建設增加，鋼鐵產品需求回升，利好一眾鋼鐵股。（資料圖片）
近期港匯轉強顯示資金流入，相信與IPO活動有關。尋日掛牌嘅同仁堂國藥（08138）開市價4.7元，較招股價3.04元高54.6%，結果全日高位喺7.19元，收6.53元，較招股價高1.3倍，真係信者得救！
航運股擺脫弱勢
資金開始發掘追落後對象，連一向呈弱勢嘅航運股，尋日都有異動，中海集運（02866）及中國遠洋（01919）升8至10%、中海發展（01138）及勝獅（00716）升4至5%。此外，上周五倫敦期銅創一年半以來單日最大升幅，江銅（00358）股價做好，順住呢個思路，同樣屬於低PB嘅鋼鐵股，亦見到有買家開始落場試水溫，尋日升幅最大嘅藍籌股，正係積極拓展海外鐵礦業務嘅中信泰富（00267），以全日高位9.96元收市，升幅2.79%；鞍鋼（00347）、馬鋼（00323）同重鋼（01053）升幅介乎4至6%。
咁啱重鋼公布，今年首四個月累計鋼材產量升11%，單係四月份則按年升19.6%，料數據利好鋼鐵股氣氛。作為短炒，阿莊屬意馬鋼。
今年首季馬鋼錄虧損3.85億元人仔，較去年同期虧損4.68億元人仔有所收窄，預期截至六月底止中期業績將見紅，但股價已作反映；反而公司喺季績補充，隨着保障房等建設增加，鋼鐵產品需求回升，料月度虧損將可逐步減少，喺原燃料市場和鋼材市場未發生重大變化嘅前提下，中期虧損將較去年同期減少。
阿莊亦相信，今年次季鋼鐵業有機會觸底，下半年嘅經營情況可優於上半年。再睇馬鋼嘅估值，現價市帳率僅0.5倍，H股較A股折讓逾一成，大有追落後條件。近月股價多次成功考驗1.8元水平承接，目前50日及250日線分別處於2.05元及2.02元，一旦以大成交突破，下站睇三月高位2.33元。
