樓市出更：大屋苑估價兩月一截
唔經唔覺政府推出新辣招都兩個幾月，真係隨手搵一個大型屋苑單位銀行估價都出現回落，但講到跌得最甘，原來係藍田麗港城及鴨脷洲海怡半島，最新估價比招前回落大約7.4%，事實上，呢兩個屋苑招後交投又係十大屋苑之中最少，業主要減價先可以出到貨，估價想唔急跌就奇啦。
麗港城上月只有約六宗成交，銀行估價跌幅亦較其他屋苑為大。（資料圖片）
新辣招後估價跌幅較大屋苑
劉Sir睇過各家銀行最新網上估價資料，當中以恒生銀行（00011）對市況睇得最淡，根據該行網上估價數據，上述藍田麗港城一個高層單位，喺二月底出招前估價大約540萬元，近兩個多月估價「十萬、十萬」咁跌落去，連跌3次至最新估價約500萬元，累積跌幅多達7.4%。
買賣疏落 出貨要劈價
至於海怡半島亦「跌得慘」，屋苑一個高層單位最新網上初步估價約莫630萬元，對比返二月底招前錄得嘅680萬元估值，足足唔見咗50萬元，即係兩個月累減大約7.4%。
劉Sir知道，上述麗港城及海怡半島分別喺三月同四月份，都只係錄得單位數成交，係十大屋苑當中表現最差兩個屋苑，估價梗係「順理成章」跌得最勁啦。
其實仲有一個屋苑估價較新辣招前跌超過7%，就係將軍澳新都城，據滙豐銀行網上資料，該盤2期低層單位，最新估價大約531萬元，較招前錄得嘅573萬元回落咗大約7.3%。
第一城嘉湖估低逾6%
照咁睇，似乎銀行對市區屋苑估價取態比較保守，但新界區兩大龍頭藍籌屋苑沙田第一城同天水圍嘉湖山莊，招後估價跌幅實質上都唔係差好遠，好似沙田第一城一個中層單位，二月底新辣招前網上初步估價大約為520萬元，今個月最新估價得番約486萬元，近兩個月都跌咗約6.5%。
嘉湖山莊美湖居中層單位最新錄得嘅初步估價約268萬元，相比二月底嘅285萬元，都輾轉回落咗大約6%咁多。至於其他估價錄得下跌嘅屋苑就真係不能盡錄。劉Sir只可以話畀大家知，整體而言，各個大型屋苑最新估價比起招前，普遍都跌咗3%以上。
