股神巴菲特澄清，話對尚德無興趣，亦無意加碼在中國的投資，加上歐盟或對國產太陽能產品徵收懲罰關稅，搞到一眾光伏股尋日逆市下跌。至於三月亦曾澄清過同尚德無任何潛在投資或重組關係嘅光大國際（00257），尋日再創6.5元的五十二周新高，以接近全日高位6.49元收市，升逾半成，從事清潔能源明顯得寵啲。

光國雖然去年營業額倒退2%至34億元，不過純利增長四成至11億元，期內公司以2.1億元轉讓非主營業務福州青洲大橋權益，有助佢以後更專注發展節能環保產業。受惠「十二五」規劃，光國旗下的污水處理、垃圾發電項目均前景不俗，其中內地垃圾焚燒處理規模要由一○年底的每日8.9萬噸，提升至一五年底的30.7萬噸。睇番幅圖，股價自一月起沿住10日及20日線上升，期間出現幾次假跌穿，但依然能夠屢創新高，未有貨嘅話，都仲可以候回吐睇位收集，唔大貪先睇7蚊。

光大國際（00257）

阻力位：7.00元

支持位：5.83元