太陽日誌

上星期美股創新高，夜期早已啟示港股將向兩萬三關口進發。尋日大市裂口以22,967點開出後，估唔到全日在116點波幅下悶到收市，收報22,915點，成交縮到得521億元。成分股呆呆滯滯，不過二三線炒風再次有轉熱迹象，升跌股份比例69對31，是七個交易日以來最好，個市唔單止乾挾淡倉咁簡單！然而，要小心今日收市後滙控（00005）季績，過去幾季營運數據，分析員通通都話衰多過「Like」，只怕個市借呢隻恒指第一大權重股，來個短線調整。

太陽日誌

大行對國美之預測（人民幣）

近期恒指由21,423點反彈近千五點，計計同年初比較，終於轉跌為升，指數有1.1%進帳，儘管同美股同期的14.2%、日股的31.7%、及泛歐的4.3%升幅不可同日而語，但至少已跑贏排響隊尾的A股。A股估值唔貴，四月PMI麻麻都無再跌，而且技術走勢開始見底背馳，反彈相信係遲早問題，不過尋日飯局，一班buy side老友卻完全唔同睇法，尤其上星期連歐洲都加入減息，美國及日本持續泵水救經濟，唯獨中國仍在努力為四年前四萬億救市收拾殘局，近日所見，經濟復甦力度唔強，人行為免愈滾愈大的非銀行體系融資信貸爆煲，都要為寬鬆政策打修正球，如果單睇信貸鬆緊周期，內地股市好難有運行。

筆者同意，股票平唔等於要升，不過唔放水亦唔代表一定無人吼，但諗落歐美日齊齊印鈔，相反人民銀行掉轉邊做，或者未來一年，押注人民幣升值不失為一個good call，近日人仔屢創新高，但年初至今累積不過升值1%左右，同市場共識全年要升3至4%，仲有一段距離。

資金無嘢好炒，連基金棄股都唔放過，雨潤（01068）全資附屬南京雨潤食品，因為按內地會計準則的首季季績，由去年勁蝕4.98億人民幣到今年錄得合併淨利潤300萬元人民幣，股價居然因此狂升13.2%，收5.21元，計落市值單日暴漲11億，呢300萬人民幣嘅桿槓效果着實驚人！

雨潤炒上理由牽強

去年勁蝕6億人民幣的雨潤，因高管變動及業績依賴透明度低的補貼，嚇怕唔少賓架。彭博顯示，19個撰寫報告分析員得2個敢叫買，股價由一○年底高位30.8元，跌到月初見4.32元，尋日贏到真係不能不寫個服字畀你。

環顧現時大市，已經衰到貼地，又或者就快貼地的基金棄股好似寧捨多，隨口都講得出李寧（02331）、國美（00493）、思捷（00330）同霸王（01338）。但弱勢股之所以成為弱勢股，總有佢嘅原因，就霸王而言，從護理品零售店的貨架所見，其能否翻身的確是一大問號；至於思捷，時裝品牌走下坡後，救亡失敗比成功的例子多。國美的問題則是內地電器網購毛利勁低，但開發成本卻遠高於傳統零售；最後就係要問李寧割價出貨仲要玩到幾時。正因為輕易搵到九百幾個理由支持唔買，佢哋嘅股價先至咁平，亦吸引到股民不斷去試運氣，但買隻唔跟市的股票，響現時升市下，其實機會成本好高。