雖然業務確有好轉迹象，但昨日雨潤股價急升，應是炒家炒落後居多。（資料圖片）

港股一如所料隨外圍高開，恒指一度高見22,980點，可惜大市成交未見配合，僅521億元。查實四月港股升市跟嘅人唔多，升到上23,000點邊，追又唔係唔追又唔係，但相信一旦再挾穿23,000點，而外圍市況又配合嘅話，嗰班一路旁觀嘅基金可能要被迫入場追貨，仲要大大注買以圖追快啲應付半年結，咁嘅話後市可能尚有一段有成交嘅升浪，配合埋一批IPO登場，可以話係完美布局，若然如此，則次季下半截先至係戲肉！

雖然業務確有好轉迹象，但昨日雨潤股價急升，應是炒家炒落後居多。（資料圖片）

今年以來美股不斷創新高，雖然以PE計道指現時（14.5倍）仍低於○七年（21倍）嘅水平，但別忘記呢幾年美國不斷印銀紙，今時今日國債孳息同五年前簡直係天同地，所以好難直接比較。

就業數據離奇轉強

講開又講，上周五美國公布嘅非農就業數據，四月份新增職位16.5萬個勝預期，但奇就奇在新修訂嘅三月份新增職位為13.8萬個，與上月公布嘅初值8.8萬個差成5萬個，差異之大，換着發生喺祖國，可能會惹來「阿爺篤數」又或統計水平差之類嘅評語﹗如今美國經濟好轉，可以成為做好藉口，但說成退市機會增，又可成為沽售藉口。總之喺呢啲非常時期，真係冇咩章法好跟，總之人在魚缸，隨波逐流量力而為，至緊要揀中冧巴！

大市成交冇大變化，仍留喺魚缸嘅資金繼續玩碰碰車，尋日中資券商股喺RQFII同新股影子概念下繼續炒高。花旗發報告話，今年「七一」唔排除中央又會「送大禮」，如推出人仔同業拆息相關產品、放寬港人每日兌換兩萬蚊人仔上限、增批RQFII額度、以及推動與前海、深圳及廣東跨境合作等。咁講法，持倉中嘅中銀香港（02388）會係受益股。

異動股方面，尋日見隻雨潤食品（01068）一升就13%，收報5.21元，成交2.31億元。事後孔明話雨潤旗下嘅南京雨潤今年首季錄得淨利潤300萬元人仔，相比去年同期蝕4.98億人仔，顯示公司業務正在復甦，但其實呢個消息公司喺四月廿六日嘅通告已作披露，為何等尋日先至以之作為炒作藉口？更何況，雨潤高層喺三月下旬已公開表示，公司已過最壞時間，但復甦過程較長。看來係炒家見其上月股價跌唔落，趁指數高企博大霧炒轉落後。有智慧不如趁勢，技術上下一個較大嘅阻力位喺250日線5.91元，回吐宜守穩50日線5.02元。