Fundman睇市：中美放水 誤中副車

中國官方及滙豐編製的四月份製造業採購經理指數（PMI）報50.6及50.4，比三月份數字50.9及51.6進一步回落，儘管連續七個月企穩在擴張界線50樓上，但復甦力度唔強，製造業活動無確係未見明顯起色。首季內地GDP增長7.7%，當中政府開支及房地產投資佔比例甚高，反之消費內需持續放緩，推動經濟增長的失衡情況仲未有改善。

美國次按風暴引發金融海嘯已五年，當日放水，目的係推動經濟改善就業，最終旺了股債樓市。內地放水只能谷起房地產，消費及企業投資則持續低迷，近日人行掉頭收水免得通脹再惡化，中美都想搵針對經濟的「鏢靶藥」，不過都係醫得頭嚟腳又痛。

港股假期後復市，受內地數據唔好影響，終止了五連升，恒指跌68點，報22,668點，主板成交562億。沽空佔比由9.56%反彈到11.13%，升跌股份比例42對58，是過去六日以來至差。

中移（00941）及工信部先後放風，話下半年會有4G服務登場，相關電訊設備股炒到飛起。內地傳媒指，政府可能揀五月十七日「世界電信日」時正式發出營運牌照，估計未來兩星期，電訊設備股可能到達第一個高峰。

中興無睇淡理由

筆者話過今年係沽空中移買電訊設備股，睇番四月初至今，TCL通訊（02618）升53%、中國無線（02369）升31%，偏偏覺得四平八穩的京信（02342）及中興（00763），只升得5.7%及1.2%，又一次睇啱板塊揀錯股。但內地新聞預測，中移200億元人民幣TD-LTE招標中，手機佔採購額低於一成，我都想知點解TCL通訊及中國無線升成咁！

姑勿論點，假如中移真係要在全國150個城市，建設20萬個基站，實在無理由唔睇番設備股龍頭中興。首季業績賺2.05億元人民幣，按年升36%，業績重點係按季毛利率見底回升，意味歐洲的蝕錢訂單完成得八八九九，研發費及員工數目經過瘦身之後，經營開支開始見頂回落，估計第二季業績會有明顯反彈，下半年隨着4G的訂單到位，股價重返四月低位的機會應該微乎其微，14元樓下上車風險有限。