中移4G項目招標在即，手機設備股全面炒上，中興有追落後空間。（資料圖片）

滙豐四月份中國製造業PMI終值略遜市場預期，再次惹來內地經濟硬着陸嘅疑慮。尋日外地傳媒繼續發表看淡中國市場言論，更有外電報道官方嚟緊制訂嘅一四年度GDP增長可能會進一步下跌。

中移4G項目招標在即，手機設備股全面炒上，中興有追落後空間。（資料圖片）

基本上，今時今日內地經濟數據疲弱，係中央政府刻意人為所造成，「人為」兩個字十分重要，即係話一切盡在中央控制手中。只不過，值得留意嘅係，喺經濟數據持續疲弱之下，人行未有停止過正回購，即係話無意因為咁而向市場放水。魚缸乾塘，乃A股停滯不前嘅底因。

TCL通訊升唔停

環顧各大中資板塊，資源股同商品股都冇運行、內需疲態令消費類股難以飛天，內銀、內房及本地地產股均受調控政策所限。橫睇豎睇，冇幾多個板塊可供炒作，結果尋日又開電訊設備股呢瓣，TCL通訊（02618）雖然經營數據欠佳，但喺憧憬嚟緊出貨量回升之下，股價迭創五十二周高，尋日升12.5%。

五月份中移（00941）將推出200億人仔嘅4G項目招標，尋日市傳中興（00763）及中國無線（02369）有手機入圍中移首批4G商用手機招標，中興及中國無線股價分別升3%及7%。另外，一向表現較落後嘅京信通信（02342）同晨訊（02000），股價亦分別升4.9%及10%。唔單只手機股逆市升，連提供流動通訊增值服務嘅內容供應商都有異動，靜咗好耐嘅第一視頻（00082）同A8（00800）雙雙進身十大升幅榜，股價均升逾一成。就連被喻為魚缸「潛艇」、近年開始加大力度開發移動設備產品嘅中芯（00981）股價亦升10%，板塊升勢如此全面確係少見，某程度反映呢期真係好缺炒作對象！

有智慧不如趁勢，中興季績顯示核心收入仍然疲弱，但毛利率按季有改善。鑑於去年比較基數較低，中績毋須過分睇淡，且市場對「4G大餅」呢棵救命草予以期望。適逢板塊氣氛熾熱，做定兩手準備，若短線回吐守13元，10日線有勢抽穿50日及250日線，則是浪有望反覆向15元阻力區推進，若跌穿12.8元則暫宜作壁上觀。

順帶一提，持倉中嘅中燃（00384）亦有異動，尋日遂以均價7.8元增持兩萬股。