樓市出更：長實百億地 起好未必賣

屋宇署最新資料顯示，三月份共批出21份建築圖則，劉Sir知道，當中有8項係住宅及商住發展。

數到最矚目係上述半山波老道21、23及25號豪宅項目，獲准興建總共6幢建築物，其中5幢為樓高18至22層高分層住宅，另1幢為4層高會所，而呢6幢物業分別建於3至4層地庫上，總樓面大約43.6萬方呎。

大部分單位或收租

當年劉Sir都有份見證長實投得呢幅土地嘅歷史時刻，一一年六月時以116.5億元拍賣投得，集團董事總經理兼副主席李澤鉅投到地皮後仲話，呢幅「一級一」靚地喺霧線以下，又就近中環金融區，起好都唔捨得賣，有機會將大部分單位用作收租。

私宅落成量銳減68%

至於灣仔莊士敦道130至142號，即係龍門大酒樓舊址等，亦准建1幢27層商住樓及改建現有建築物，總樓面約7.5萬方呎，申請人係恒生銀行（00011）同CHI Residences等。

另一方面，新地（00016）嘅東涌第55A區限呎項目獲批出重大修訂申請，5幢分層住宅樓層均較去年底批出方案減少1層，最新係27至29層，原先計劃另外提供6幢2層高住宅，最新方案就減至3幢。

商業方面，三月就有11項商業發展獲批建築圖則，包括會德豐地產喺一一年投得嘅紅磡紅鸞道及建灣街交界商業項目，項目准建4幢2層及15層高商用物業，總樓面約59.3萬方呎。

另該署又提到，三月份只有8伙住宅落成，按月大減約68%，為二十九個月以來嘅單月新低。

此外，規劃署建議修訂旺角分區大綱圖，今個年度賣地計劃入面嘅豉油街及新填地街兩幅小型地皮，由政府用地改劃住宅用途，兩地可提供約93及20伙中小型住宅。