Fundman睇市：海爾電器可追落後

受美股再創歷史新高推波助瀾，港股完成五連升壯舉，假期前恒指升156點，報22,737點，主板成交回升至524億元。

踏入五月，股市諺語成日話「Sell In May and go away」，睇番過去十年紀錄，五月份港股六跌四升，升跌比例唔係一面倒。史提芬早前估計最壞情況下，恒指今年見兩萬點並唔出奇，尤其以過去兩年浪底分別在16,000及18,000點水平粗略推測，如果跌到兩萬點水平，港股估值在10倍左右，以歷史角度計絕對便宜，問題係當個個都等住兩萬點入市的話，往往這個共識的低位，都唔會出現。到底港股是否已經見了今年低位？老實講史提芬信心只係一半一半。

港股走勢有待觀察

依家心中的最大隱憂，是華爾街股市投資者近日雖然顯得對經濟前景一臉樂觀，但睇番美國十年債券孳息，自三月初見2.08厘高位後便拾級而下，近兩星期兩次跌穿1.65厘水平。資金重投債券這被視為低風險的資產，顯示股市債市嘅投資者對未來有截然不同嘅睇法。由兩個賭場的深度及往績，史提芬傾向相信券商眼光，消耗性上升的美股，或者十分接近短期高位，估值便宜兼且十二分落後的港股，到底會是跟跌抑或受惠於資金由美股回流新興市場？有待觀察。

假期前，TCL多媒體（01070）及海信科龍（00921）分別升約一成。家電股表現神勇，緣於發改委公布新一輪節能產品惠民工程高效節能家電推廣目錄。睇番今次名單有十三間公司產品入選，TCL多媒體及海信科龍母公司青島海信電器各有21及18隻產品入圍，補貼介乎150至400元人民幣。不過買55吋LCD電視慳四舊水，對銷情有幾大刺激？而同主攻白家電的海信科龍又有乜關係？大家心中有數。

不過，內地樓市經過一輪密集成交期，新屋對家電需求，加上面板等原部件價格回落，今、明兩年家電股可被看高一線。兩股股價及創維數碼（00751）今年均累升逾六成，只有海爾電器（01169）今年較落後，升得兩成左右，考慮到估值唔貴，近期有躍躍欲試迹象，挑戰14至14.3元的雙頂，短期趁家電板塊火熱，不妨留意吓會唔會出現追落後情況。