歐元兌美元走勢

歐元自從由1.37水平跌至1.27水平見底後,最高曾反彈至1.32水平,但跌嘅力度又唔夠,初步喺1.30水平爭持。不過,呢幾個星期其實都幾多消息,例如德國央行行長魏德曼就表示,如果歐元區經濟進一步惡化,央行需要考慮進一步減息。呢番言論對市場嘅影響都相當大,其轉口風亦令市場認為歐洲央行減息的可能性升溫。而歐洲央行副行長Vitor Constancio就同魏德曼企喺同一陣線,話通脹高低,係歐洲央行決定減唔減息的重要依據,而事實上歐元區三月份通脹已跌至1.7%,創下自一○年八月以來最低。

歐元兌美元走勢

事實上,德國製造業同服務業數據都表現疲軟,例如PMI就跌至47.9,而歐元區PMI亦表現麻麻,又點可以唔令市場擔心? 雖然即使歐洲央行將已經係歷史低位嘅0.75%利率水平進一步下調,都未必對歐元區經濟有好大幫助,但減息會令歐元下跌,長遠有助刺激歐洲出口貿易。

不過,歐元沽盤反而持續減少,CFTC報告顯示,上星期反而多咗投資者減少歐元淡倉,而過去幾日市場有傳言指有中東買盤持續逢低買入,市場猜測屬於將美元儲備多元化的動作,因此操作策略不宜追沽,要入市就寧可在1.3150上方沽空,支持在1.2880,升穿1.32先行止損。