太陽日誌2013/4/30

內地魚缸開始五一假期，加上日本股市休市，昨日港股428億元成交創埋今年新低，恒指升33點，報22,580點。雖然跨周連續四日升市，但整體大市股份升跌比例繼續轉差，昨日為44對56。唔少當炒二三線股已見「回回哋」，周三又放假，個市睇怕至少都要靜埋今日。聽日內地公布四月製造業採購經理人指數，市場估緊會由三月50.9跌到50.7，如果再差啲，只怕滬綜指復市未必守得住今年低位2,165點，小心。

太陽日誌2013/4/30

綜合大行預測渣打業績（美元）

《一手住宅銷售條例》開始實施，無論如何，發水進一步受限制，加埋交易透明度進一步提高，早前雙辣招加雙倍印花已令成交大減，樓價有明確見頂回落迹象（為促成成交業主降價幅度已高於買方要付雙倍印花稅（DSD）的代價），估計未來新盤市場會由賣方主導，漸漸轉為買賣雙方較均勢的局面，地產商中短期內要繼續賺到盡的難度已經大增。

地產股逆市受壓

本地幾隻重磅地產股昨日通通逆市向下，長實（00001）、新地（00016）、恒地（00012）、信置（00083）及新世界（00017）跌幅介乎0.5至1.5%。瑞銀引述美聯（01200）預測，今年港樓價要跌5至10%，該行估計雙辣招加埋DSD夾擊，估計未來兩個月新盤交投會進一步減少，但仲係睇好擁有較多收租商用物業，以及在內地有新盤推出，得以平衡本地套現金額減少的長實、新地及新世界。

內銀股季績陸續曝光，工（01398）農（01288）中（03988）建（00939）四大行，按季盈利分別增長29.9%、88%、20.4%及70.3%，按年計都有12.1%、8.2%、8.2%及15.7%增幅。四大行季度成績表現比市場估計好，概括原因包括淨息差收窄少過估計、較高的利息收入、以及非利息收入按季反彈。客觀睇，內銀估值便宜，主要係政策的客觀因素左右，要出現報復式反彈，先要睇連升五季的不良貸款，會唔會在未來一兩季開始回落，及人行為寬鬆政策打修正，完成正回購收水行動至掂。

講開銀行，渣打（02888）年初派完份破紀錄的成績表之後，股價出現反高潮，由215元高位掟番落現價196.3元。去年賺近半百億美元，亞洲佔渣打稅前收入六成，其特色是不依重單一市場，香港貢獻最大，也僅佔總稅前收入近兩成，無疑是一大賣點，可惜形勢比人強，尤其經歷一二年國際銀行股大反彈，一三年歐美銀行股已見升幅放緩，加埋日本金融機構今年的超強吸金力，連續十年業績錄得增長的渣打，被大孖沙視為雞肋，確係有些少始料不及。

渣打最近向大行透露的營運指引，今年首兩季業績對辦，收入維持按年雙位數增長，街外估今、明兩年純利57.8億及64.1億美元，市盈率10.7及9.7倍，今、明兩年預期息率3.6厘及4厘。相比內銀，筆者對渣打有較大信心，最近187元或已見中長期低位，趁現階段反彈有限，估值唔貴，應可放心出手。