漢能宣布計劃拓展下游光伏應用市場，股價即時有正面反應。（資料圖片）

尋日A股同日股都休市，港股喺期指結算日後變動不大，大市成交創今年新低，僅430億元。今日係五一假前交易日，料市況維持淡靜。尋日係一手樓銷售新例實施首日，本地地主股普遍偏軟，市場需要時間適應變化，更公平公正嘅銷售，對買賣雙方都係好事，但幾時先係買入地主股嘅時候，就要視乎樓市交投復甦進度。

漢能宣布計劃拓展下游光伏應用市場，股價即時有正面反應。（資料圖片）

上周買入嘅天能（00819）受內地負面報道影響，股價插落低位4.76元，阿莊買入時話跌穿5.2元止蝕，尋日朝裂口低開見5.08元，惟有忍痛止蝕，還好買得唔多，睇到收市價倒慶幸有嚴格執行止蝕慳番啲！

天能有條件博反彈

齋睇技術走勢，照計呢浪守穩上旬低位4.57元嘅話，有條件博反彈，且待公司作出澄清交代再見機行事。另外，尋日以均價7.53元買入兩萬股中國燃氣（00384），公司剛喺台灣簽訂三年期4.5億美元貸款融資協定，消息正面。

市況淡靜，板塊炒風未見突出，睇番個股消息，漢能太陽能（00566）披露，擬成立漢能全球光伏應用集團，進軍下游太陽能業務，拓展全球太陽能發電及光伏應用市場，但未有披露詳細時間表。

過去一年，上游光伏股業績紛紛見紅，相反，興業太陽能（00750）股價由去年中低位2.46元升到上今年高位見10.38元，即使目前股價已大幅調整，現價仍有6.45元。能夠跑贏同業嘅原因，係公司專注做下游業務，既受益於原料價格下跌，亦受益於下游產品需求旺盛，好似尋日公司又宣布新增咗4億多元人仔傳統幕牆工程、高端幕牆材料及綠色建築業務等訂單。

所以，睇見漢能話大舉拓展下游業務，股價即時有反應，一度高見0.57元，收報0.55元，升5.7%，創前年五月上旬以來高位。去年末季以來，其股價一直沿50日線回揚，本月中旬一度跌穿50日線，低見0.405元，但頭尾三個交易日收復失地，如今更創出近兩年新高，事後孔明睇，嗰一跌應該係震倉，咁講法往後股價升幅可能不止於此。但補充一句，呢隻股股價波動頗大，除咗本月上旬一跌外，今年一月亦曾試過喺三個交易日內股價急插三成，所以擬沾手者，亦要做好坐過山車嘅心理準備。