樓市出更：十個買豪宅僅一內地人
政府舊年年底推出雙辣招，今年二月仲整多個雙倍印花稅，買樓愈豪稅款就愈甘，梗係嚇窒班內地豪客。劉Sir睇見代理一份臨時數字，今年第一季樓價1,200萬元以上嘅豪宅成交，內地個人買家比例得番約11.1%，按季勁跌17.2個百分點，係○七年第二季後新低，估計嚟緊內地客只會愈來愈少。
貝沙灣本年首季暫錄約五宗內地個人買家入市個案。（資料圖片）
本港整體豪宅內地個人買家季度統計
種種辣招當中，以買家印花稅對內地豪客影響最深，買樓要大拿拿畀樓價15%稅款。中原黃良昇同劉Sir講，今年第一季整體豪宅市場，已知內地個人買家佔比例按季銳減17.2個百分點至約11.1%，涉及金額比例勁縮15.6個百分點至16.1%，對比一一年第三季高峰期錄得嘅41.1%及45.7%，足足唔見咗30同29.6個百分點。
「大款」掃新盤曾佔五成
如果拆開一手同二手市場嚟睇，近年新盤市場畀內地客搶爆，劉Sir發現，自一○年第一季開始，內地個人買家佔一手豪宅買賣登記比例，季季都超過三成，最癲嘅時候係喺一一年第三季，錄到49.3%嘅比例，即係差唔多兩個買家，就有一個屬「北水」。
不過，無論班內地豪客幾有錢，都似乎唔願意硬畀重稅，該行數據顯示，今年首季一手豪宅買賣登記中，已知內地個人買家佔比例僅18.3%，按季大減21.6個百分點，涉及金額亦跌21.1個百分點至24.6%，同創近十四個季度新低。
業界：失北水銷售更難
二手豪宅方面，第一季已知內地個人買家買賣宗數及金額，佔比例分別約7.1%及10.8%，比起舊年第四季亦大減11.6及9.9個百分點。期內錄得最多內地個人二手買家嘅豪宅包括西區寶翠園，成交及金額佔5宗及約1.02億元最多，其次係港島南貝沙灣有5宗，共約9,400萬元。
黃良昇話，買家印花稅政策短期內都唔會有改變，所以內地買家只會愈來愈少，本港豪宅市場將會失去重要客源，代理銷售難上加難。
