一月推介過嘅比亞迪股份（01211）喺二月十八日創咗32.8元的五十二周新高後，股價反覆回落，直到四月中先至有番啲起色，上周五再急升12%，以近全日高位28.15元收市，短線若可突破三月高位29.85元，或者10日線能升穿100日線現黃金交叉，下站阻力上移到五十二周高位。

睇番比亞迪成績表，除首季營業收入增長9.8%至128.8億元（人民幣．下同）、純利增長3.2倍至1.1億元外，仲發盈喜，預期公司中期淨利潤按年增長23.6至29.7倍，到4億至5億元。業務復甦值得讚好，而功勞係來自汽車銷量有所增加、智能手機新訂單市場反應良好、光伏產品價格略有回升令太陽能業務虧損收窄，同埋傳統二次充電電池業務增長加快。另有報道指比亞迪首批計劃投入於本港使用嘅45部電動的士，已全部以半年期合約租出，每月8,000港元，最快五月中前正式載客，而佢同德國Daimler公司成立的合營，有傳一齊研發嘅電動車將於明年面世，電動車業務發展具憧憬。

比亞迪股份（01211）

阻力位：32.80元

支持位：24.65元