太陽日誌

四月期指結算前夕，近期好友有愈挾愈有的味道，上周五A股向下都無影響恒指升勢，周五再有146點進帳，收報22,547點，主板成交624億元，但值得留意的是，整體大市535隻股份升，634隻跌，升市中個股是跌多升少，加埋周五大市陰陽燭圖出埋低收的射擊之星，今日結算，估計短期急升後，大市要先打個修正球，試番22,000至22,200點的支持，先至再有運行。

太陽日誌

綜合大行預測國壽業績（人民幣）

受惠於內地首季股市氣氛好轉，最近幾隻內險股業績表現唔錯，中國人壽（02628）出成績表，首季純利大漲79%，至101億元人民幣，遠勝市場預期，主要多得投資收益率改善，資產減值損失由高峰回落。然而，更能反映保險公司營運情況的保費收入，期內僅1,119.2億元人民幣，按年跌2%，上周五國壽股價可以升1.4%，收報20.9元，講到底係大孖沙之前過分悲觀所致，其實份業績真係唔可以稱為理想。

國壽業務乏催化劑

業績大反彈，關鍵係首季投資收益按年升37.2%，達260億元人民幣，資產減值損失大幅減少89%，由去年同期的76.8億元回落至8.47億元人民幣，總投資收益率5.82%。由於去年第二季基數都仲係好低，按年數字繼續大升唔出奇，由第一季數字，估計中期業績的VNB（新業務價值）可能只有低增長甚至同去年相若，估值係平，但業務營運方面缺乏催化劑，短期最多技術反彈，好難轉勢，要揀保險股，友邦（01299）依然秤高些少。

中國每年有2,000萬個新生嬰兒，國民消費力近年不斷膨脹，加埋一孩政策有放寬趨勢，同胞在全球搶購嬰兒奶粉情況愈來愈嚴重，英德澳紐先後推出限奶令，限制奶粉出口保障國人利益。

內地十大奶粉品牌長期手握八成五以上市佔率，個個父母都為子女健康着想，近兩年的十大品牌，唔係「來路貨」，就係標榜百分百海外奶源的本地品牌洋奶粉，伊利，蒙牛乳業（02319）本來都做得唔錯，不過嬰兒奶粉收入比例始終有限，近半年，股價持續做好的合生元（01112）以及雅士利（01230）算係四平八穩，財政也比較健康，唯一問題係，兩隻股票估值唔平，往績市盈率分別達28.1倍及17.5倍，一二年業績勁升，多少是因為一○年及一一年業績基數比較低，今年綜合大行估計盈利增長26%及17%，除非被睇中收購，否則股價升勢可能唔及過去大半年的速度，可以揸，但加注就真係要諗諗。