上周港股有轉勢迹象，今日期指喺高位結算已無懸念，而五月份魚缸亦似乎唔再一面倒睇淡。呢浸升市特色之一係頭段成交淡薄冇人敢跟，到指數挾到破晒位，不同板塊輪流接力炒上，一路旁觀嘅股民都有啲心動小試牛刀。阿莊冇阻人發達，雖然對後市信心不足，但都叫大家少理指數上落，炒股唔炒市。上周炒咗轉莎莎（00178），組合持股的天能（00819）表現唔多盞，周內會視乎情況定去留，反而隻新晨動力（01148）有番啲起色，睇吓呢轉發力踩唔踩得番上高位2.48元。

展望本周，A股休假至周四才復市，呢期A股水緊，跌唔落但亦升唔起，休市也許可令大戶喺冇後顧之憂下繼續喺港股挾淡倉，現時恒指距離23,000點唔夠五百點，冇咩嘢係冇可能。講開A股，繼月初以來多家大行話睇淡A股同內地經濟，上周二外電引述消息指，美國市場安碩富時中國25指數基金截至上月底嘅做空股數，創○七年以來嘅最高水平，又指上月以來投資者不斷從該基金撤出資金。不過，內地官方似乎唔想人心惶恐，上周五中證監出嚟派定心丸，話未見上市公司境外戰略投資者和合格境外機構投資者大規模賣空A股。

面對各有各說，阿莊嘅睇法係，中國金融市場尚未全面開放，透過非正式渠道流入A股嘅資金規模不小，即使係近兩年外資做空中國市場，亦唔見得官方數字能預示跌市來臨。總而言之，客觀上內地市場流動性未有大改善之下，A股難以飛天。

個股方面，呢期汽車、家電、手機、電池、頁岩氣等股份都輪流開車，獨見燃氣股仲未翻撻。提到呢個板塊，高盛本月中旬發表嘅報告亦指出，金價跌，意味市場對經濟前景信心增強，有助帶動天然氣需求，天然氣價格會回升，並取代黃金成為商品市場資金嘅避險之地。

中燃可先行落注

天然氣價格看漲，有利燃氣股身價。內地氣價改革加上城鎮化帶動燃氣需求，燃氣股嘅半公用性質令人揸得安心。就趁板塊未起哄，留意中線收集機會。本月中旬推介過嘅北控（00392）仍然係實力之選，波動相對較大嘅就有中國燃氣（00384），正等候落實與中石化（00386）嘅戰略合作詳情，現價可考慮先落首注，主要支持喺7至7.1元水平，中線目標再上試8.5元阻力。