金碧花園

近排政府就元朗南房屋發展進行諮詢，仲話研究放寬地積比率去到唔超過5倍，劉Sir支持谷供應，但做唔做到真係有保留。有測量師老友都覺得以嗰邊交通等配套，加到3倍都未必食得落。但換個角度，無論密度幾高、造公營房屋定私樓，對市民置業都有幫助，原因好簡單，因為平，好似區內金碧花園最近成交建築呎價都係講緊約4,000元。

金碧花園

采茵軒

唐人新村一帶最近買賣市況

元朗南具發展潛力嘅土地有200公頃，當中接近一半係露天儲物場、工場同倉庫，如果善加運用可以為區內帶來相當數量嘅住宅供應。

交通設施料難負荷

不過，劉Sir睇過唐人新村分區大綱圖，範圍內劃作住宅用途的土地，地積比率都只係0.4倍至1倍左右，如果真係加到唔超過5倍，嗰邊交通配套未必能夠負荷。

老友高緯環球張翹楚都認同劉Sir諗法，佢認為增加地積比率要視乎地盤大細，而元朗南暫時都欠缺集體交通設施，所以真係要加大地積比率嘅話，莫講話5倍，就算3倍都未必食得落，覺得如果要加大，可以參考屯門掃管笏嗰邊，地積比率大概1.3倍會合適啲。

尋日發展局局長陳茂波喺網頁上撰文，提及初步收集意見，有人質疑發展元朗南牽涉民居，擔心會成為菜園村翻版。佢話，計劃發展區域中只係有百分之八係農地同住宅，不過承認發展元朗南有好多限制，包括缺乏鐵路及道路等基建配套，亦要考慮對文化生態及「祖堂地」等私人業權嘅影響。老友世紀21龍軒張啟賢話，區內用家主導市場，大部分業主一手買咗都未必放售。

金碧花園建呎價4155

睇番土地註冊處資料，好似區內金莎花園及逸翠軒等，今年都仲未有成交，數到最近期，金碧花園就喺今個月錄到1宗成交登記，該盤9座低層B室成交價300萬元，建築呎價4,155元，以今時今日樓價水平，其實唔貴。雖元朗南畀人感覺係較為荒蕪，但市民想喺元朗南「住豪啲」都唔係無辦法，就好似新世界發展（00017）提供51幢洋房嘅柏巒，主打五房五套房，項目最快下個月開售。