魚缸Blogger：綠城中國 有力再升

綠城中國（03900）雖然輸咗塊上海外灘地王官司要上訴，不過呢幾日股價依然硬淨，一個月就已經見到暴炒妹定的阻力位15蚊，尋日收報15.2元，微升0.6%，如果以推介當日收市價13.5元計，至今累積升幅逾12%，配合啱啱突破頭肩底走勢，短線應該有力再升多浸。

除去年成績表靚仔，反映銷售同財務重上軌道外，綠城今年再下一城，將全年銷售目標由400億元（人民幣．下同），提高至550億元。公司首季實現合約銷售金額121億元，按年增長1.6倍，已達全年目標的22%，而單睇三月就賣咗1,525套房，合約銷售金額60億元，比起上月增加一倍，可見內地調控樓市無礙增長步伐。上月一眾壞消息如新「國五條」、「鹹水樓」等，搞到內房股哀鴻遍野，但見之後地方版細則出台無乜料到，對於績優嘅綠城嚟講，影響力得半個月貨仔，睇怕負面因素已經反映得七七八八。

綠城中國（03900）

阻力位：16.50元

支持位：14.57元