股海實戰：北控水務可追落後

港股繼續挾淡倉，好一幕屠熊記！雖然阿莊都係口淡淡，但一直叫人避開指數相關產品，炒股唔炒市。總覺近期大市走勢與去年同期有點相似，但眼見尋日A股回軟，仍無礙港股升勢，乃大戶全心挾倉嘅另一佐證，正所謂「好漢不吃眼前虧」，暫時別唔信邪心急開淡倉，畢竟技術上恒指剛確認突破下降軌頂部，有權再挾一浸，直至班散戶忍唔住手落場追貨為止。

電池股個別發展，據講上海最近出台鼓勵電動汽車充換電設施發展辦法，今年至明年底，對符合扶持條件嘅充換電設施，給予不超過30%嘅財政資金支持，相信此舉有助加快環保汽車普及。尋日提及嘅天能動力（00819）上過5.5元，收報5.47元，升1.4%，成交1,845萬元，阿莊以平均價5.39元跟進兩萬股，目標上試5.8至6元，失守5.2元止蝕。

上周提及過嘅中芯（00981）公布季度數據，銷售額連升四季，且再度錄得盈利，毛利率亦見改善，股價受追捧，尋日升8%至0.54元收市，成交2.21億元，人氣唔錯。論基本因素，對呢隻股阿莊自問信心尚待恢復；若論短期走勢，市況同成交配合嘅話，有權上試0.58至0.6元阻力區，跟炒宜守0.5元止蝕。

中資股輪流炒，尋日連一直積弱嘅資源股亦有表現，兗煤（01171）升3.2%，江銅（00358）及中鋁（02600）分別升4%及2%，但呢類仍面對長期供需失衡問題嘅行業，炒得令人唔放心，寧願又再睇番啲環保股。環保水務中，尋日北控水務（00371）股價有異動，急升7%至2.4元收市，事緣獲大行唱好，花旗將其目標價定喺2.75元，相等於一三年預測市盈率20倍。

光國享溢價有因由

走勢上，同樣做環保水務嘅光大國際（00257），股價正受制於6元大關，而北控水務則已進行近兩個月嘅調整，股價剛以大成交重上50日線，短線走勢向上。

論估值，相比光國現價一三年度預測市盈率20倍，北控水務具炒落後條件。但須補充，光國可取之處在於除環保水務業務外，還積極拓展垃圾發電及新能源項目營運等環保業務，且已開拓海外市場，業務亦較多元化，估值享溢價事必有因，中短線股價喺突破6元關前會維持上落格局，但站喺中長線角度，相信仍是基金首選環保股。