樓市出更：趙世曾賣屋買家慳稅億三

政府出招，投資者拆招，炒樓繼續賺。馬灣珀麗灣6期海珏有個連花園單位，上年有買家透過公司名義形式一手買入，之後再以買賣公司名義賣咗，啱啱又以同樣方式以約1,438萬元再賣，單位年多共升值逾25%，兩轉二手都有錢賺，料慳稅共近330萬元。卓能集團（00131）執行主席趙世曾亦以公司轉讓形式放售山頂施勳道卓能山莊兩間豪宅，話可為買家慳逾約1.3億嘅稅款。

海珏依家入緊伙，聽中原溫明峯同劉Sir講，個盤錄到收樓後首宗二手買賣，個成交係32座連花園單位，建築/實用面積1,407/1,126方呎。

海珏炒兩轉賺200萬

上述單位原業主減價110萬元，以買賣公司形式賣咗1,438萬元，建築/實用呎價10,220/12,771元，比上年五月購入價賺200萬元，由於唔駛畀額外印花稅等使費，故係淨賺。

呢個單位原先由買家喺上年二月以約1,148.1萬元向發展商一手購入，三個月之後再同樣以買賣公司形式，以1,238萬元賣比原業主，啱啱又走多轉，個盤年多用公司買賣形式走咗兩轉，升值大約290萬元，次次淨袋，辣招後都未見過。溫氏又講，海珏依家有6個買賣放盤，叫價比購入價高約30%。

卓能山莊兩屋嗌5.7億

趙世曾都同劉Sir講，卓能山莊現址地皮喺九五年投地番嚟，之後起咗三間屋，其中紫菀居賣咗，淨番交吉嘅紫薇居同收緊租嘅紫棠居，每間屋建築面積約莫六千呎，呢兩間屋依家由一間公司揸晒，諗住用公司轉讓形式賣畀單一買家，叫價5.7億元，咁樣賣可以為買家慳到8.5%物業印花稅同埋15%嘅買家印花稅（BSD），計落總稅款夾埋慳成億三。

另一方面，卓能山莊開放參觀期間，劉Sir撞見第一集團董事霍偉良話，專登上嚟觀摩下，為佢哋興建中緊嘅九龍塘豪宅攞靈感，而由於九龍塘個項目諗住以獨立地段形式出售，所以唔使跟一手住宅銷售條例賣樓，所以彈性多啲。雖然呢類用買賣公司形式嘅買賣，成日都聽到，但其實會有一定風險，所以地監局一早都提醒代理朋友，做呢類買賣要小心。