股海實戰：天能動力 長短皆宜

德國經濟數據差強人意，但反成為憧憬歐央行減息嘅藉口，美股受企業業績消息帶動，隔晚歐、美股市高收，帶動港股尋日回升，午後升幅擴大，恒指收報22,183點，升376點，成交增至617億元。

玩開期指嘅炒家叫晒救命，事關諗住前日恒指又再失守22,000點便加沽，點知又畀人挾，認真無癮！阿莊已多次提及，短期最好少沾手指數相關產品，事關市況交投薄弱，大戶容易將指數舞高弄低，左一巴右一巴只會損耗銀彈及戰鬥力。

持貨過夜可免則免

下周就係「五一」黃金周，周一至三A股休市，此前五一概念股亦要睇位食胡。持倉中嘅莎莎（00178）尋日升抵目標價，已按計劃以7.76元均價沽出獲利。反觀前日異軍突起嘅頁岩氣股，又係得一日貨仔，尋日逆市低收，高追又要接火棒。呢期炒風咁短癮，正如阿莊尋日所言，跟炒策略只宜上晝見到邊個板塊異動就跟上車即日鮮，等下晝先喺高位追貨要三思，持貨過夜更加可免則免。

好似尋日輪到手機股接力，臨尾市股友打嚟叫跟隻京信通信（02342），阿莊心諗上晝冇上車，下晝亦無謂高追，收市後睇到TCL通訊（02618）份首季業績，收入同比雖增16%至24.48億元，但虧損達2.46億元，毛利率同比降4個百分點至16%，整體表現可謂「乏善足陳」。偏偏公布呢份季績前，尋日其股價搶高14%收市，高追揸過夜，見到呢份季績都咪話唔頭痕！

尋日另一異動板塊乃電池股，主要係中聚電池（00729）獲城中首富加注，股價飆升25%，帶動板塊氣氛，其中天能動力（00819）升4.8%，收報5.39元。呢隻股有基本因素支持，唔怕佢炒一棍就無影。事實上，阿莊都唔只一次講過，喺同類股中，天能嘅優勢在於已建立廢鉛酸蓄電池回收及再生設施，覆蓋全產業鏈，配合一五年行業廢鉛酸蓄電池嘅回收和綜合利用率達90%以上，鉛循環再生比重超過50%嘅目標發展，而上月官方發布嘅行業意見，對繼續利用廢鉛酸蓄電池生產再生鉛企業實行增值稅即徵即退50%嘅稅收優惠政策，足見公司行啱方向。

今年二月，天能股價高見6.17元後回落，上月宣布擬發優先票據集資，相關消息已消化，250日線及周線圖上升通道底部支持均經得起考驗，另公司派發末期息每股0.238元將於下月廿二日除淨，現價往績市盈率六倍多，估值唔係貴，長揸短炒皆宜。