樓市出更：港島甲廈買賣 冧七成

政府兩個月前「出招」令唔少寫字樓買家即時停晒手。有代理估計，今年三月同四月，港島甲級寫字樓買賣加埋少於6宗，比舊年同期大插超過七成，金鐘力寶中心有個單位，劈價逾10%放盤，唔怪得投資老手黎汝遠（黎Sir）都話，寫字樓後市好難睇，今年成交量或跑輸大市。

本來今年初整體寫字樓買賣都唔錯，劉Sir收到美聯商業同其他代理啲資料，原來一月份港島甲級寫字樓買賣超過10宗，二月份仲勁，有近20宗，買賣側重炒味較濃嘅金鐘力寶中心，兩個月加埋差唔多20宗，佔期內整體約66%。

蝕讓撻訂個案湧現

反而同區美國銀行中心、海富中心，灣仔會展廣場辦公大樓、中環皇后大道中九號及上環信德中心，買賣較為疏落，個別大廈更加「食蛋」。

踏入二月底，政府推出雙倍印花稅，寫字樓蝕讓及撻訂等個案開始湧現，如黎Sir三月初先棄購力寶中心1座低層單位，帳面唔見達約200萬元後，早排買入嘅該廈2座低層單位，今個月被黃海明「撻摸」，於是又棄購；早幾日黎Sir更加蝕讓「摸出」中區永安集團大廈高層單位，約半年帳面損失約300萬元。黎Sir都話，睇怕寫字樓樓價仲有得跌，加上入市成本高，短期買賣成交會好靜。

綜合代理資料，三月份港島甲級商廈買賣插水，只錄約4宗成交，而本月迄今更跌至只有1宗，代理估計，今年上半年整體港島甲級商廈成交會有機會少於60宗，將按年少一成。

力寶中心劈價一成

甲級寫字樓買賣兩閒，樓價點會唔跌，其中力寶中心，依家有啲單位放盤每方呎叫價低至1.7萬元，較今年初該廈同類單位意向水平劈10%。另今年只錄得零星買賣成交嘅信德中心，其中西翼一個約2,000方呎單位，業主調低意向價至3,800萬元，呎價低至1.9萬元。另東九龍有商廈業主劈價減磅，中原（工商舖）黃國明話，觀塘俊匯中心錄到「加辣招」後首宗買賣，單位係中層06室，原業主減價一成以約830萬交吉賣咗，呎價約8,575元。