Fundman睇市：中移 現價乏吸引力

滙豐編製的中國四月份PMI初值得50.5，低過市場預期的51.5，拖累尋日中港股市分別跌2.6%及1.1%收市。恒指跌237點，收報21,806點，成交567億元，五月期指見大戶紛紛開始轉倉，超過兩萬張成交，沽空佔大市成交比例周一回落至8.88%後，尋日彈返去10.6%水平，短期大市繼續係炒股唔炒市格局。

中移（00941）公布三月底止的首季營運數據，收入升5.7%，至1,347億元（人民幣．下同），純利278.79億元，升0.3%，公司歸咎於一人多卡的普及，拖累每月每戶平均消費（ARPU）錄得11.2%跌幅，僅63元。期內總客戶7.26億，微升2.2%。從ARPU的慘況，真係睇唔到中移升級到3G TD網的好處，吸收的都是低消費用戶，今年受制於「全球獨家打造」4G TD網絡的固定開支，加上本身核心業務增長已由快轉慢（慢轉無？），股價80港元水平計，息率4厘左右，有點雞肋味道，食之無味棄之可惜。

廣州樓市調控加碼，今日開始全面執行商品房住宅預售價格要預先網上申報的制度，接受國土部價格「指導」。消息話廣州版國五條出台前，當地新建商品價格，比去年同期勁升三成五（單是第一季就升兩成二），可能是今次急急出招應付的導火線。

廣州項目比重較高的有雅居樂（03383）及合景泰富（01813），大行估計分別佔資產淨值的27%及29%，但尋日股價跌1%及1.1%，比中海（00688）、潤地（01109）及富力（02777）幾隻受影響唔大的領袖股的2.5至3.5%跌幅仲少，莫非芬佬有晒心理準備？抑或睇通今次樓價又係愈調愈升？暫時看來，兩個可能性同時存在。睇番三月全國七十大城市，有六十八個樓價向上，估計四月樓價轉趨平穩甚至微升，成交量維持較高水平的機會存在，除非國五條加辣版登場，否則內房股仲係可睇高一線。

海螺有調整需要

進取的行銷策略下，安徽海螺（00914）首季水泥銷量大增四成，至4,630萬噸，可惜受水泥價格回落影響，期內水泥每噸加工毛利，令首季純利報9.72億元，按年跌22.2%，同大行估計差唔多。綜合大行預測，海螺一三年純利87.28億，升35%，目前只完成當中的11.1%，睇落有啲落後，但踏入第二季，內地水泥價格已見明顯反彈，四月中旬，海螺每噸水泥毛利已回升至「七」字頭水平，尋日幾間大行都繼續唱好，相信在價量齊升之下，第二季開始業績可迎頭趕上，現價預期市盈率13.5倍，估值尚算合理，股價周一因為炒地震刺激建材需求，高見29.8港元，短期升幅唔細，需要一次合理調整，如果能夠回到20日線，即大約26.9港元附近，可以重新考慮。