股海實戰：持盈保泰 少做少錯

呢期魚缸淡靜，市場消息對股價波動容易被放大，好似前日有內地報道長城汽車（02333）首季SUV銷售增長佳，股價急升一成半，點知翌日公司否認報道，股價一度倒跌。再睇建材股炒四川災後重建概念，得一日貨仔又走晒樣，真係睇到人頭擰擰！

近日同卜架食飯，講起魚缸淡靜嘅問題，大家都有感除咗宏觀因素影響之外，近幾年兩地監管尺度收緊亦不利市場流動性。好似早幾年IPO市場好熱鬧，但依家大國企經已上得七七八八，且監管嚴厲，班投行家怕敏感，做法已大有不同，加埋魚缸缺水，結果今時今日IPO市場淡靜，掛得牌嘅表現都係平淡居多。

職業炒家難生存

再睇往日不乏即市大幅波動嘅股份，吸引炒家上車即日鮮，但近年卻不多見，皆因往日呢類異動股多數點都會Trade到收市，但依家動不動就中途停牌，一旦拉閘分分鐘渣都冇得剩，邊個敢博？結果「水清無魚」，職業炒家愈來愈難維生，魚缸交投惡性循環，長此下去如何養活整個金融行業？難怪連投行家都笑言，唔想害人就咪叫後輩入金融業！

講番尋日市況，恒指22,000點關又再得而復失，原因係內地經濟數據欠佳，A股低收。內地經濟增長放緩已屬不爭事實，阿莊身邊喺內地做生意嘅友人都話，今年以來生意冇改善，搞房地產嘅就話樓盤賣唔出，咁究竟內房股嘅銷售數字係咪海市蜃樓？還有愈演愈烈嘅地方債問題，猶如喺內銀業埋下炸彈。始終紙包唔住火，求神拜佛阿爺呢座大靠山經濟唔好硬着陸，否則香港逢三之年必有災劫可能又再應驗！

今年只係過咗一季多啲，要抱戰戰兢兢嘅心態看待年內餘下日子。參考舊年五月上旬恒指跌穿250日線便進入全年最激嘅一次尋底之旅，阿莊維持季內恒指一旦失守21,000至21,100點水平就要沽貨離場嘅睇法。除非年內資金面有明顯改善，否則任何升市只能作反彈市看待。散戶持盈保泰，少做少錯係最自保嘅方法。順帶一提，組合持有嘅莎莎（00178）走勢對辦，高位曾見7.6元，短線會睇位食胡。至於個股推介，由於炒風短癮，惟有每朝見邊類股異動就小注跟炒即日計數，唔使有咩大智慧！