樓市出更：莎莎唔執輸 搶租恩平道

近排韓國化妝品牌「喪搶租」銅鑼灣等一線街舖，而本港「龍頭」化妝品店之一嘅莎莎國際（00178）都唔執輸，正式啱啱租咗銅鑼灣恩平道50號地下及1樓舖位，正正同一間剛開業嘅韓國化妝品牌黐到好埋，埋身肉搏。聽講佢哋出手都好進取，月租近百萬元，比起舊租升咗超過1.4倍，喺依家零售市道唔明朗情況下，都算好勇。

有代理同劉Sir講，上述恩平道50號地舖同1樓面積約莫1,200方呎，原本係一間連鎖錶行租用，月租大約41萬元，早排租約屆滿後已遷出。

上址市值月租大約100萬元左右，相信業主最後埋單會考慮平少少，莎莎料以近百萬元租用，呎租大約830元，劉Sir都搵過莎莎發言人公開租金等詳情，但佢只回應無可奉告。

內地客捧場唔憂生意

內地客對化妝品特別鍾情，所以市道好唔好都有捧場客，所以化妝品店長久以來都積極搵位開分店，出手畀租都幾闊綽。有個韓國化妝品牌，租咗恩平道54號地下部分，聽講面積大約480方呎，月租差唔多60萬元，呎租達約1,250元，比舊租高近1倍。有代理話，佢個位正正對住希慎廣場，人流有保證，所以佢隔籬兩邊分別係上述莎莎，以及本地另一連鎖化妝品卓悅，相信大家日後會爭崩頭。

羅素街舖獲10億洽購

銅鑼灣一線街舖可遇不可求，聽講區內羅素街有個依家由連鎖鐘錶店租用嘅地舖，租約將期滿，業主嗌月租350萬，比起現租金升逾1.5倍，可能收租回報吸引，依家已經有客出價約10億元洽購，呎價逾66萬元。

旅遊前景唔錯，酒店住宿物業都好搶手，有見及此，韋堅信測量師行許偉國話，上環干諾道中128號豫泰商業大廈1至15樓其中35個將作服務式公寓單位，同埋地舖等樓面標售，意向價約3.5億元，下月二十二日截標。另外，據土地及公司註冊處資料，屯門區遠東發展屯門大廈地下1號舖及1至4樓等樓面以1億元成交，買家公司董事係鄧成波，同劉Sir認識嘅「舖王」波叔同名。