有利有幣：繼續沽鎊目標先看1.5

上星期全球都公布通脹數字，其中美國通脹按年升幅1.5%，遠低於聯儲局目標2.5%，料聯儲局未有耐退市。

而英國通脹就按年維持喺十個月高位2.8%，遠高於英倫銀行目標2%，不過在通脹同經濟增長兩者之間，都係經濟行先，所以嚟緊繼續加推QE的機會仍相當高，只不過時間上，大家都估緊會唔會等七月一日卡尼上場後先出手。出唔出手都唔係問題，不過今年聯儲局就開始炒緊退市，有咁大對比，明顯英鎊中線仲係睇淡，所以上個星期已經講英鎊仍舊要沽。

新西蘭亦公布通脹數字，但令市場一地眼鏡碎。今次數據睇到紐元都未有加息壓力，連呢隻今年唯一有條件講加息嘅貨幣都唔加息時，應該會凸顯出美元嘅吸引力，筆者仍然相信紐元基本因素唔算差，不過，如果商品價格進一步下跌，紐元兌美元都未必有條件再上衝，短線有機會先反覆測試0.8350，再進一步支持會在0.8150。

今個星期就轉睇GDP數據，美國及英國將分別公布第一季GDP數據，其中英國GDP備受關注，雖然市場預期將增加0.1%，一旦數據差於預期，將增加英國經濟三度衰退的擔憂，英鎊將確認於1.5410反彈見頂再次回落，目標先設於1.50，進一步可看跌至1.48。