股海實戰：創維 破位展強勢

四川地震未有震散A股，尋日滬綜指僅跌2點收場，港股亦偏穩，恒指企穩22,000點樓上，但成交薄弱，除咗災後重建及相關概念股，以及汽車及家電股之外，其他板塊未見太突出。阿莊維持恒指短期喺22,300至22,400點水平遇重大阻力嘅睇法，且相信後市仍有兇險，短期策略只宜小注跟炒個別強勢板塊，瞓身追入重磅股就可免則免！

阿莊對後市維持審慎看法，因魚缸資金面未見持續性好轉，股指喺反彈過後再度尋底機會大。再講，綜觀好友所講嘅三大利好因素，人仔匯率擴闊浮動區間，舊年四月做完之後A股照跌；至於重啟RQFII，唔係首次，規模亦有限，頂多只可視作維穩，而難推動股指飛升；而MSCI研納入A股於系列指數，一來雙方唔係今時今日先至開始研究，二來內地解決資金自由流動同外資稅務等問題前，根本難以成事。

提防外資加注淡倉

結論係，一日內地資金面冇鬆動，A股投資者維持信心低迷，任何人為托市因素只可起短暫效果。若然「五．一」前未有其他實際利好因素出現，估計班外資會再睇位加注淡倉，宜密切留意本周期指轉倉變化，話唔定魚缸主戰場喺五月出現！

尋日提及嘅莎莎（00178）走勢對辦，以均價7.16元買入兩萬股，初步目標睇7.7元，止蝕位7元。回看上周中資板塊中，家電、乳品及內房股係最先開車。針對家電股，城鎮化同新產品上市下，今年行業前景展望穩定，係支持板塊表現嘅最大原動力。尋日加埋炒災後重建概念，見本周四將公布季績嘅海信科龍（00921）股價再升5.9%；創維（00751）亦好爭氣，股價創出五十二周新高，見6.2元，收報6.19元，升幅4.2%。有內地傳媒指，喺近期進行嘅廣交會上，冰箱同家電嘅成交額上升逾49%。咁講法，唔排除呢浪最先上車嘅，係最先收到風而胃口又唔細嘅內地炒家。

事實上，唔少本地炒家都覺得創維唔易炒，呢次開波係老表主導亦唔出奇。以現價計，創維一三年度預測PE約10.7倍，同類股TCL多媒體（01070）現價估值相若。睇圖表走勢，自○九年中開始，創維股價一直受制於6元關，如今成功破位，值得留意，只係睇見其股價已連升兩周，日線圖14日RSI已經去到72，短線或須先行整固。做定兩手準備，企穩6元樓上嘅話，再發力下一阻力區喺6.5至6.6元區域；若回落至6元樓下，則可待試5.7至5.8元承接再作考慮。