樓市出更：基金掃工廈 活化有錢途

話說雙倍印花稅（DSD）措施嚇窒唔少買家，但有啲大孖沙就好少理，睇啱就「扑錘」買。鵬里資產管理或有關公司日前斥9.8億元，買入觀塘鴻圖道建大工業大廈全幢，呎價差唔多4,900元。有代理話，喺依家樓市咁靜嘅環境，基金今次出手都算好勇，仲要畀印花稅款約8,300幾萬元。由於觀塘市中心將會全面重建，相信佢哋會積極諗將物業重建，或者搞活化。

近排東九龍大額物業買賣好旺場，繼宏利人壽保險早排子大手斥45億元，購入東九龍One Bay East西座全幢商廈樓花後，鵬里資產管理等亦購入鴻圖道73至75號建大工業大廈全幢，幢大廈總樓面約二十萬方呎左右，即呎價大約4,900元。

有區內代理話，依家東九龍工轉商補地呎價都要5,000幾，若基金重建上址為商廈，成本呎價過一萬，圍起上嚟無肉食，反而活化工廈使費都係一億左右，但日後租金升值的話，賣價每方呎可以八千幾。而是次成交買家要畀DSD費用約8,300多萬元，可見佢有幾睇好觀塘後市。

灣仔全幢商廈索20億

市區全幢商廈更吃香，仲量聯行陳桂衡話，永亨銀行集團依家標售灣仔告士道60號永亨金融中心全幢商廈，意向價約二十億元，以總樓面約9.55萬多方呎計，呎價近2.1萬元，幢大廈樓高27層，總樓面約9.5萬多方呎，依家大部分樓面係該銀行自用，物業可交吉出售，截標日期係今年六月五日。近期恒地（00012）等力谷黃竹坑環匯廣場商廈樓花盤，尋日再加推25樓全層，定價近8,740萬元，呎價約8,900元。

黎汝遠蝕讓中區永集

近期連環慘遭滑鐵盧嘅投資者黎汝遠，聽講佢啱啱蝕讓摸出中區永安集團大廈高層單位，涉資約4,070萬元，呎價只1.35萬元，約半年帳面損失約300萬元，蝕幅近7%。

另市場代理話商舖有大租，尖沙咀廣東道雙號一個地下至2樓巨舖獲化妝品連鎖店承租，月租約200萬元，呎租180元。